Euroja dixhitale merr një datë. Sipas planeve aktuale, ajo duhet të jetë e disponueshme për pagesa me pakicë nga viti 2029, ndërsa projekti pilot me 36 ofrues të shërbimeve të pagesave parashihet të nisë në vitin 2027. Aktualisht po zhvillohet faza përfundimtare e bisedimeve mes Parlamentit Evropian dhe vendeve anëtare për mënyrën e funksionimit.

Çfarë është, në fakt

Dallimi më i rëndësishëm i pari: euroja dixhitale nuk është kriptovalutë. Nuk është një valutë dixhitale e pavarur që lundron mbi pritjet e tregut - është një formë dixhitale e euros, e lëshuar dhe e garantuar nga Banka Qendrore Evropiane.

Praktikisht, përdoruesit do të kishin një portofol dixhital përmes të cilit do të mund të paguanin me telefon, kartë ose pajisje tjetër - në dyqane, online dhe mes personave fizikë. Pra, para të bankës qendrore në formë dixhitale, krahas parasë së gatshme dhe pagesave elektronike ekzistuese.

Pse BE-ja e bën këtë tani

Paralelisht me projektin publik, edhe sektori privat po ndërton rrjetin e vet. Aleanca evropiane e pagesave EuroPA dhe Nisma Evropiane e Pagesave EPI nënshkruan një marrëveshje për lidhjen e sistemeve të tyre të pagesave të menjëhershme - një platformë që potencialisht do të përfshinte rreth 380 milionë përdorues në 15 vende anëtare.

EuroPA bashkon disa sisteme kombëtare pagesash: „Bizum” spanjollo-andorran, „Bancomat” italian, „Blik” polak dhe „Vipps MobilePay” nordik. EPI, nga ana e vet, zhvillon markën e pagesave „Wero”, e pranishme në Gjermani, Belgjikë, Francë dhe Holandë.

Parë së bashku, qëllimi është i qartë dhe nuk ka nevojë për përkthim diplomatik: Evropa dëshiron infrastrukturën e vet të pagesave. Çdo pagesë me kartë sot kalon në pjesën më të madhe përmes një infrastrukture që nuk është evropiane, e në kohën kur marrëdhëniet tregtare me SHBA-në janë të tensionuara, varësia nga një sistem i huaj pagesash shihet ndryshe nga pesë vjet më parë.

Ku jemi ne në gjithë këtë

Maqedonia nuk është në eurozonë, prandaj euroja dixhitale nuk do t'i vijë automatikisht. Por denari është i lidhur me euron, një pjesë e madhe e shkëmbimit tregtar është me BE-në, ndërsa shumë familje marrin rregullisht para nga jashtë - më së shpeshti pikërisht në euro.

Kur infrastruktura evropiane e pagesave të ndryshojë, ndryshon edhe shtegu nëpër të cilin kalojnë ato pagesa. A do të jetë sistemi bankar vendas i përgatitur për këtë apo do ta marrë vesh në vitin 2029, është një pyetje që dikush duhet ta shtrojë para vitit 2029.

Tri vjet tingëllojnë shumë. Nuk janë - sidomos për një sistem që ende nuk ka mbaruar as me pagesat e menjëhershme.