Ndërsa prej vitesh zgjasin debatet për djegien e mbeturinave në furrat e Titan Usjes, rezultatet financiare tregojnë se kompania punon jashtëzakonisht me fitim. Vetëm në periudhën nga 2023 deri në 2025 Titan Usje realizoi një fitim prej thuajse 85 milionë eurosh, ku më e mira ishte viti 2024 me një fitim prej mbi 30 milionë eurosh. Shifrat hapin pyetjen nëse një pjesë e të ardhurave të realizuara duhet të drejtohet drejt investimeve shtesë për uljen e ndikimit mbi mjedisin jetësor dhe transparencë më të madhe ndaj publikut.

Sipas raporteve financiare, kompania në vitin 2023 realizoi një fitim prej 24,6 milionë eurosh, në 2024 fitimi u rrit në 30,9 milionë euro, ndërsa në 2025 arriti 29,4 milionë euro.

Titan Usje shënon fitim prej thuajse 30 milionë eurosh në vit, kurse qytetarët që jetojnë në rrethinën e fabrikës ende frikësohen për cilësinë e ajrit që thithin. Nuk është fer që fitimi të privatizohet, kurse rreziqet e mundshme për shëndetin dhe mjedisin të mbeten barrë e popullatës vendore. Një kompani që realizon rezultate të tilla financiare ka edhe detyrim moral edhe shoqëror të tregojë se shëndeti i qytetarëve është po aq i rëndësishëm sa edhe fitimi.

Njëkohësisht, fitimi i lartë e largon edhe çdo mundësi për të justifikuar se masat eventuale shtesë ekologjike do të përbënin barrë financiare tepër të madhe për kompaninë. Përkundrazi, shifrat tregojnë se ka hapësirë për investime edhe më të mëdha në monitorim, filtra, teknologji moderne dhe informim transparent të publikut.

Nga ana tjetër, rezultate të tilla financiare i japin dorë të lirë edhe Qeverisë të insistojë në standardet më të larta ekologjike dhe kontroll të rreptë të punës. Kur një kompani realizon fitim prej dhjetëra milionë eurosh në vit, vështirë mund të pranohet argumenti se përmbushja e detyrimeve shtesë ekologjike do ta rrezikonte qëndrueshmërinë e saj ekonomike. Prandaj, publiku ka të drejtë të presë edhe nga kompania edhe nga institucionet ta vënë shëndetin e qytetarëve para çdo interesi tjetër.

Nëse fitimi është kaq i madh, atëherë vendi për ekologjinë nuk është në margjinë të bilancit, por në qendër të përgjegjësisë ndaj qytetarëve me të cilët kompania ndan të njëjtin ajër. Stop djegies së mbeturinave.