Дрон со експлозивна направа е пронајден во текот на ноќта на аеродромот Лајпциг/Хале во источна Германија – неколку метри од паркиран украински товарен авион Антонов. Не над Донбас. Не над Харков. Во НАТО-членка, на еден од најважните товарни аеродроми во Европа.

Сомнителниот предмет го забележал вработен на аеродромот, по што полицијата испратила робот за отстранување на експлозивни направи. Стручњаците го отстраниле детонаторот, а направата потоа е контролирано уништена. Според германскиот Велт, на дронот била прицврстена експлозивна материја за која се сомнева дека е семтекс. Истражителите веруваат дека до експлозија не дошло само затоа што детонаторот не работел.

Тоа е реченицата околу која треба да се задржиме. Разликата меѓу безбедносен инцидент и напад врз инфраструктура во срцето на Европа овој пат била – неисправен детонатор.

Што е Лајпциг/Хале, а што не е

Аеродромот не е случајна точка на мапата. Тоа е едно од најважните европски товарни воздушни пристаништа и главен логистички центар на ДХЛ. Го користат и германската војска и сојузниците од НАТО за превоз на воена опрема. Таму е сместена и украинската компанија Антонов Ерлајнс, чии авиони превезуваат голем дел од украинскиот воздушен товар.

Поради инцидентот сообраќајот бил привремено прекинат. Северната писта е повторно отворена во текот на ноќта, додека јужната останала затворена. Не многу потоа, товарен авион на ДХЛ во близина на истиот аеродром се судрил со непознат објект. Екипажот го продолжил летот и слетал во Хановер, каде на предниот дел од авионот се пронајдени помали оштетувања. Истражителите проверуваат дали постои врска меѓу тој настан и пронајдениот дрон.

„Кој друг би можел да биде освен Русија?”

Германските власти случајот го истражуваат како сериозен безбедносен инцидент, но засега не соопштиле кој управувал со дронот ниту дали целта била напад. Саксонската полиција, обвинителството во Дрезден и сојузната полиција поведоа истрага, во која се вклучени и германски безбедносни службеници. Саксонскиот министер за внатрешни работи, Армин Шустер, случајот го опиша како „многу сериозен безбедносен инцидент”.

Украинскиот амбасадор во Германија, Олексиј Макејев, беше подиректен. На прашањето кој би можел да стои зад тоа, тој одговори: „Кој друг би можел да биде освен Русија?” Германските власти засега не објавија докази што би го поврзале инцидентот со Москва, а Русија не се огласи.

Германските аеродроми и другите чувствителни објекти со месеци се под засилен надзор поради низа неовластени летови на дронови над воени бази, енергетски постројки, пристаништа и логистички центри. Никој од нив досега не носел експлозив. Сега еден носел – и никој не одговара за него.

Прашањето што останува не е кој го пуштил дронот, туку колку вакви ноќи ѝ требаат на Европа за да престане да ги нарекува „инциденти”. Балканот има свое искуство со тоа како изгледа кога закана се именува дури откако станала историја.