Тинејџерите ја кренаа Франција на нозе: над 250.000 луѓе на улица, а Макрон дури сега свикува кризен состанок

Не почна од синдикатите, ниту од опозицијата. Почна од средношколците. Кон крајот на септември учениците во париската област ги блокираа своите училишта, иницијативата ја презеде Синдикатот на средношколците, и за неколку недели движењето се разлеа низ цела Франција – од Лил, преку Марсеј, до Нант. Во вторникот, на националниот ден на акција, им се приклучија синдикатите, наставниците и родителите.

Што бараат? Ништо револуционерно. Се жалат на недостиг од професори, пренатрупани распореди, запуштени училници и згради што не се прилагодени на сè повисоките температури. Основи, со други зборови. Звучи ли познато?

Бројки што Елисејската палата не може да ги игнорира

Министерството за внатрешни работи изброи 256.000 демонстранти во цела земја, од кои 56.000 во Париз. Синдикатите во образованието тврдат дека на улица биле 450.000 луѓе. Министерството за образование признава дека наставата била целосно или делумно откажана во 891 средно училиште, а синдикатите зборуваат за 1.800 блокирани или претпазливо затворени. Министерството за високо образование соопшти дека била нарушена работата на 40 отсто од универзитетите – најголем удел од почетокот на движењето.

Тука почнува грдиот дел. Дел од протестите поминаа мирно, други се претворија во насилство: запалени училишта, скршени излози во близина на Плоштадот на нацијата во Париз. Од 28 септември се приведени 6.547 луѓе. Според податоците на Министерството за правда од понеделникот, 87 отсто од дотогаш приведените се малолетници.

Во Сен-Уен-л’Омон полицаец од непосредна близина го погоди во лицето 14-годишниот Еден со проектил од фрлач на гранати. Момчето е тешко повредено. „Срцето ми е скршено“, изјави мајка му. На еден од протестите во Марсеј пишуваше: „Користете солзавец против силувачите, а не против малолетниците.“

Полицијата, од своја страна, е мета на пиротехника и други предмети – десетици полицајци се повредени од почетокот на протестите. Во Сен-Сир-л’Екол 15-годишна ученичка е задржана под сомнение дека испукала пиротехничко средство налик на минофрлачка граната во близина на бебе. На Плоштадот на Републиката демонстрант паднал од статуа висока околу пет метри и е тешко повреден. Министерот за внатрешни работи Лоран Нуњез тврди дека полициската реакција била сразмерна „во речиси сите случаи“.

Макрон се појавува дури сега

Претседателот Емануел Макрон досега јавно не се мешаше во кризата. Дури по најмасовниот ден, од Елисејската палата протече дека свикува кризен состанок со премиерот Себастијан Лекорну, министерот за внатрешни работи Нуњез и министерот за образование Едуар Жефре. Во меѓувреме, од другата страна на Атлантикот, Доналд Трамп ги обвини масовните миграции и исламот за немирите во Франција – иако луѓето на улица бараат професори и училници.

Средношколските и студентските организации веќе најавија нов бран за четвртокот, „четвртиот“ по ред. „Ако се мобилизираме само еден ден, ќе кажат дека претеруваме и едноставно ќе продолжат понатаму“, вели Бенжамен, средношколец од Со. Тинејџер го сфатил она што многу возрасни уште не го сфатиле: еден ден протест е фотографија, а секојдневна блокада е притисок. Дали некогаш ученички протест на Балканот натерал власт да свика кризен состанок?