На половина час од Рим постои гратче каде што еднаш годишно водата станува вино. Не е чудо, туку обичај стар над еден век: на гроздоберот во Марино, на ридовите Кастели Романи југоисточно од италијанската престолнина, фонтаната на главниот плоштад наместо вода пушта вино.

Гроздоберот, Sagra dell’Uva, годинава се одржува по 102-ри пат. Го започнал поетот и новинар Леоне Чипрели во 1925 година, со идеја на едно место да ги спои бербата, виното и историјата на градот. Виното од фонтаната е дел од фестивалот уште од првото издание.

Фонтана за победата кај Лепанто

Главната ѕвезда е Фонтаната на четирите Мавари на плоштадот Матеоти. Изградена е во 1632 година за да ја одбележи победата на Маркантонио II Колона во битката кај Лепанто – поморската битка од 1571 година во која христијанските флоти ја поразија османлиската. Фонтаната има три нивоа: осум камени сирени долу, четири човечки фигури горе и грб на семејството Колона на врвот. Во Втората светска војна беше оштетена, а потоа обновена и преместена.

Ако планирате, рокот е краток. Главниот момент е во недела, 4 октомври, во 17:30 часот, а втора шанса има во понеделник, 5 октомври, во 18:45. Во неделата програмата почнува со водени тури и верска церемонија со благослов на грозјето во 10:30, а рано попладне по улиците минува историска поворка што го пресоздава враќањето на Колона како командант на папската флота. За време на целиот фестивал работат село со храна и штандови со италијански земјоделски производи. Влезот на прославите, поворките и настапите е бесплатен.

Што уште да видите

Старото јадро на Марино вреди и надвор од фестивалот: Палатата Колона, Базиликата Сан Барнаба, музеите и подземните простори издлабени во вулкански камен. Посебно е светилиштето Митреум, со исклучителна римска фреска на која богот Митра жртвува бик.

Остатокот од Кастели Романи нуди уште три постојки за еднодневен излет: Кастел Гандолфо над езерото Албано, со елегантен центар и папска палата; Неми покрај малото езеро, историски поврзано со култот на Дијана и познато по јагодите; и Фраскати, со историски вили и вина.

До Марино се стигнува со регионален воз од римската станица Термини, или со метро линијата А до Анањина, па со автобусите на Cotral. За време на фестивалот има и дополнителни шатл-линии.

Италијанците од гроздобер направија туристички бренд што трае цел век. Тиквешкиот гроздобер во Кавадарци има своја традиција и свое вино. Колку би требало за и тој да стане причина некој да купи авионски билет?