Рускиот истражувачки новинар Роман Баданин, кој денес живее во азил во Калифорнија, ја објави книгата „The Tsar Himself: How Vladimir Putin Deceived Us All“, во која изнесува шокантни тврдења за приватниот и љубовниот живот на рускиот претседател Владимир Путин.

Баданин, поранешен уредник на истражувачката платформа „Проект“, бил уапсен и испрашуван од руската тајна полиција во 2021 година, откако објавил интервју со млада жена за која се смета дека е негова непризнаена ќерка.

„Во Русија постои непишано правило: не ја допирај семејната приказна на Путин,“ изјави Баданин за Daily Mail.

Книгата, напишана заедно со новинарот Михаил Рубин, опишува систематска мрежа на врски и љубовници околу рускиот лидер, која авторите ја нарекуваат „Путинов харем“.

Според нив, првата позната врска надвор од бракот била со Светлана Кривоногих, поранешна чистачка која, според Pandora Papers, станала сопственичка на имот вреден десетици милиони евра, како и луксузни станови и јахта. Таа наводно со Путин ја добила ќерката Луиза Розова.

Подоцна, во фокусот на јавноста се најде Алина Кабаева, олимписка шампионка во ритмичка гимнастика, која, според авторите, веќе две децении има посебен статус во животот на Путин. Таа во 2014 година беше назначена за директорка на Националната медиумска група, а медиумите ја нарекоа „тајната прва дама на Русија“.

Во книгата се спомнува и Алиса Харчева, тогаш 17-годишна студентка, која станала дел од блискиот круг на претседателот по објавата на провокативен календар во негова чест. Подоцна нејзиниот животен стил нагло се подобрил — добила луксузен стан во центарот на Москва и високи контакти во деловниот свет.

Иако Путин во јавноста се претставува како бранител на традиционалните семејни вредности, авторите наведуваат дека во неговиот внатрешен круг полигамијата е правило, а жените зависат од мажот за својот успех и статус.

Кремљ не ги коментирал обвинувањата, но книгата повторно ја отвора темата за личниот живот на рускиот претседател, еден од најстрого чуваните аспекти на руската политичка сцена.

„Путин контролира сè – и државата, и сопствениот наратив. Но во секоја диктатура, приватноста на водачот е неговата најслаба точка,“ пишува Баданин.