РЕК Битола сам загадува повеќе од четири земји заедно – а казна нема

РЕК Битола испуштила 7.675 тони прашина во 2025 година – повеќе отколку што смее да испушти целиот регион од четири земји заедно. Бројката е удвоена во споредба со 2024 година, а доаѓа од извештајот „Comply or Close” на еколошката мрежа Bankwatch.

Сликата на регионот е алармантна. Термоелектраните во Србија, Босна и Херцеговина, Косово и Македонија во 2025 година испуштиле сулфур диоксид на ниво 6,6 пати над дозволеното, а прашина 2,9 пати над прагот – највисоко од 2018 година наваму. Пет јагленови блокови ги надминале своите лимити за сулфур диоксид за над десет пати, меѓу нив и три блокови на РЕК Битола.

Уште поскандалозен е делот за казни: според извештајот, во периодот 2018-2025 година за овие прекршувања нема изречено ниту една казна. Рокот за усогласување е 2027 година, а просечната старост на јагленовите блокови е 49 години – постројки што одамна требало да заминат во пензија.

Зад бројките стои воздухот што го дишат луѓето во Битола, Пелагонија и пошироко. Кога една постројка сама загадува повеќе од четири земји заедно, а казна нема, пораката до граѓаните е јасна – вашите бели дробови се поефтини од модернизацијата. И додека извозот на струја кон ЕУ паѓа поради новите јаглеродни давачки, прашањето е дали ќе нè принуди економијата да го расчистиме она што здравјето не успеа.