Шенген за возачите на парче: со Хрватска договор, со Романија дозволи наместо визи, со Бугарија и Грција уште разговори

Македонските професионални возачи се заглавени меѓу граници, печати и ограничувања за влез и престој во Шенген-зоната. Вицепремиерот и министер за транспорт Александар Николоски сега вели дека државата нашла решение – не едно, туку неколку различни, договор по договор, земја по земја.

Според него, со Хрватска е склучен билатерален договор, а потоа договор потврдила и Швајцарија. Со Романија е договорено на македонските возачи да им се издаваат дозволи, а не визи. Со Бугарија и Грција се разговара возачите што влегуваат и излегуваат во ист ден воопшто да не се регистрираат. Со „одредени други држави“, вели министерот, преговорите се во финална фаза.

Виновник: бирократијата

Николоски одбива теории дека зад проблемот стои план за уништување на балканските превозници. „Да ова било некој голем план, каде што целта би била да се уништат балканските превозници и бизнисот да го земат некои други превозници, ќе го видевме. Нема таква работа“, рече тој. Неговото објаснување е попрозаично: бавна европска бирократска машинерија, на која „ѝ е тешко да носи нови одлуки“.

Министерот потсети и дека штетата не е само наша. Над 87 отсто од странските директни инвестиции во Македонија доаѓаат од Европската Унија, а и тие компании, вели, не можат да најдат алтернативен начин да ја превезат својата стока.

Крпеница наместо решение

Добро е што нешто се движи. Но да се погледне што всушност добиваат возачите: еден режим во Хрватска, друг во Романија, трет, можеби, кон Бугарија и Грција, а за останатите шенгенски земји – чекање. Возач што вози од Скопје до Германија минува низ неколку држави, а секоја има свое правило.

И самиот Николоски признава дека „нема едно целосно решение“. Ако проблемот навистина е во бирократијата во Брисел, зошто тогаш решението мора да се бара во секоја престолнина посебно – и колку возачи ќе се откажат од професијата додека се собере целата слагалка?