Првото нешто што го правиш кога ќе се разбудиш е и првото нешто што го крева нивото на кортизол – стресниот хормон што треба да се крева полека, не како експлозија. Тоа е заклучокот на новата анализа на психолози од Универзитетот Комплутенсе во Мадрид, кои тврдат: гледањето на мобилниот штом ќе ги отвориш очите префрла мозокот „во секунди од состојба на закрепнување во состојба на аларм”. Не е препорачано.

Зошто се случува тоа? Телефонот е, како што објаснува професорот Алфредо Родригез-Муњоз, „психолошко продолжение на нашиот социјален, емоционален и работен живот”. Мозокот предвидува награда од нотификации – порака од шеф, лајк од некој, бројка на банкарска апликација – и заради таа очекувана награда веднаш се вклучува на најголема брзина. Без буфер, без пауза.

Долгорочно? Постојаната хиперповрзаност гради чувство на „вечно брзање, ментално преоптоварување и психолошка исцрпеност”, вели студијата. Луѓето стануваат раздразливи, со фрагментирано внимание, и со постојано чувство дека треба да се прави нешто – дури и кога задачите се сосема разумни.

Решението е досадно но ефективно: одложи го телефонот за 15-20 минути по будењето. Природна светлина, движење, лесен појадок – тие три прости работи се доволни за мозокот да се разбуди како човек, а не како компјутер во режим. Се разбира, тоа значи да го оставиш телефонот вон спалната соба. Тоа е дисциплината што и западниот и балканскиот живот еднакво ја избегнуваат.