УАПСЕН ДИРЕКТОРОТ НА АГЕНЦИЈАТА ЗА ЗЕМЈОДЕЛСТВО – ФАТЕН „ИН ФЛАГРАНТЕ“ ПРИ ЗЕМАЊЕ МИТО!

Директорот на Агенцијата за финансиска поддршка во земјоделството и руралниот развој, Илија Стоилев, денеска е уапсен под сомнение за земање мито, потврдуваат извори блиски до истрагата за Плусинфо.

Акцијата ја спроведе Обвинителството за гонење организиран криминал и корупција (ОЈО ГОКК), во координација со МВР и Управата за финансиска полиција.

Под раководство на јавен обвинител од ОЈО ГОКК, истражители и полициски тимови извршиле претреси на повеќе локации низ земјава поради сомневање за коруптивни активности.

Според првичните информации, Стоилев бил фатен „ин флагранте“ при примопредавање на обележани банкноти, кои му биле дадени како мито за доделување финансиска поддршка преку програмата ИПАРД.

Апликантот кој го пријавил случајот, а потоа соработувал со истражните органи, е поранешен министер во Владата на ВМРО-ДПМНЕ.

Илија Стоилев, роден во 1967 година во Свети Николе, ја презеде функцијата директор на агенцијата во јули 2024 година. Тој е дипломиран земјоделски инженер и има работено како професор на Земјоделскиот факултет при УКИМ.

Во својата кариера бил и претседател на Совет на Општина Свети Николе, директор на Народниот музеј во Свети Николе и раководител во Министерството за земјоделство.

Од ОЈО ГОКК најавуваат дека истрагата е во тек, а повеќе детали ќе бидат објавени по завршување на првичните мерки.