Надзорна расправа за Алта банка без „измамата на граѓаните“: СДСМ вели дека насловот е препишан од иницијативата на ВМРО-ДПМНЕ за Еуростандард

Собранието ќе ја испитува Алта банка – но прво требаше да се изнегоцира насловот. Комисијата за финансирање и буџет одлучи да одржи надзорна расправа на иницијатива на СДСМ и коалицијата, откако од предложената тема беа избришани три збора: „за измамата на граѓаните“.

Темата сега гласи „Причини за воведувањето администрација во Алта банка АД Битола, улогата и постапувањето на Народната банка и институционалната одговорност“. Одговорност има – само не е речено за што.

Пратеничката на ВМРО-ДПМНЕ Дафина Стојаноска беше јасна: „Ние не сме тука суд, односно вие не сте суд за да дефинирате дека се работи за некаква измама на граѓаните“. Ако трите збора се тргнат, ќе ја поддржат иницијативата. Нејзиниот партиски колега Бојан Стојаноски додаде дека случајот со Алта банка не е ист со оној на Еуростандард банка, затоа што тука нема судски процеси ни обвинение.

Насловот што беше добар кога беа опозиција

Тогаш дојде најдобриот момент од седницата. Оливер Спасовски од СДСМ потсети дека спорниот наслов бил препишан од иницијативата на самата ВМРО-ДПМНЕ за надзорна расправа за Еуростандард банка, кога тие беа во опозиција. „Ако тогаш како опозиција сте биле суд, тогаш дозволете и ние да бидеме таков исти суд“, рече тој – и веднаш прифати компромис, за да може точката да помине.

Ова е Балканот во една реченица: насловот е легитимно прашање кога го пишуваш ти, а прејудицирање кога го пишува противникот. Опозицијата и власта ги менуваат местата, а со нив и речникот.

Комисијата заклучи членовите и заменик-членовите во најкус можен рок да договорат рокови, времетраење и сведоци. Спасовски предупреди и зошто брзањето е важно: дел од вработените во Собранието нема да ја земат платата, а проблем имаат и пензионерите. На седницата комисијата ги проследи и измените на Законот за Фондот за осигурување на депозити.

Надзорната расправа ќе има сведоци, рокови и наслов без збор „измама“. Дали ќе има и одговор – кој знаел што за Алта банка и кога – ќе покаже листата на сведоци. Ако на неа не се најдат првите луѓе на Народната банка, расправата ќе биде уште една точка што само поминала.