Јавното претпријатие „Паркови и зеленило” им апелира на скопјани да не паркираат под дрвја поради најавеното нестабилно време со пороен дожд, грмежи и засилен ветер. Совет разумен – но во него се крие и една непријатна вистина: три дена по последното невреме, паднатите дрвја и гранки од претходната бура сè уште не се расчистени.

Апелот доаѓа откако Управата за хидрометеоролошки работи најави нова доза лошо време. Од претпријатието повикуваат граѓаните да избегнуваат задржување во близина на висока вегетација и веднаш да пријавуваат паднати дрвја или друга опасност на бројот 112. Потсетуваме – последното невреме донесе ветер со брзина од над 130 километри на час, што нанесе сериозна штета на дрвјата низ градот.

И тука е проблемот. Додека надлежните советуваат каде да не се паркира за да не падне дрво врз автомобилот, дел од дрвјата што веќе паднале лежат по тротоарите и патеките. На места, минувачите се принудени да излезат на коловоз за да ги заобиколат скршените гранки. Собрани на купчиња на тревниците, но со денови без екипа што ќе ги однесе.

Апелот граѓаните да бидат внимателни е на место. Но внимателноста на возачите не е замена за расчистување. Ако нов ветер удри врз веќе оштетените дрвја пред старите гранки да се отстранат, штетата само ќе се удвои. Прашањето за граѓаните е едноставно: додека нам ни велат да не паркираме под дрвја, кога надлежните ќе ги отстранат оние што веќе паднале?