Министерството за здравство го задолжи Центарот за јавно здравје – Скопје вечерва да спроведе дополнителна терестична адултицидна дезинсекција во населбата Драчево. Со поедноставни зборови: вонредно прскање против комарци, од земја, надвор од редовниот план.

Причината е конкретна и се вика западнонилска треска. Од министерството посочуваат дека мерката е донесена врз основа на стручна информација и проценка на ризик од ЦЈЗ – Скопје, но и поради актуелната епидемиолошка состојба со лабораториски потврдени случаи на западнонилска треска во земјава.

Прскање во десет навечер, со отворени прозорци

Општина Кисела Вода преку своите мрежи ги повика граѓаните да ги затворат прозорците и вратите вечерва од 22 до 24 часот, за прскањето да се спроведе безбедно и ефикасно.

Барањето е разбирливо. Но времето на акцијата отвора прашање што никој од надлежните не го објасни: зошто токму во десет навечер, во период кога, по цел ден на над 35 степени, скопјани конечно ги отвораат прозорците за да се разлади станот? Час-два подоцна, поголем дел од населението веќе би имало затворено од само себе.

Тоа не е ситница. Ефикасноста на самата мерка зависи од тоа колку луѓе ќе ја испочитуваат инструкцијата – а инструкција што се судира со единствениот дел од денот кога станот може да се излади не тргнува со добри изгледи.

Десетта фаза оваа сезона

Ова не е првата акција. Според ЦЈЗ – Скопје, во текот на мај и јуни се спроведени три акции на ларвицидна авионска дезинсекција – насочени против ларвите, пред комарците да се излупат.

Во јули е реализирана и втората акција на терестична адултицидна дезинсекција, насочена кон возрасните комарци, во Ѓорче Петров, Хром, Влае, Карпош, Дебар маало, Маџир маало, кејот на Вардар, Водно, Пржино, Драчево, Маџари и Лисиче.

Значи, редовниот план работи и се спроведува. Вонредната мерка доаѓа откако веќе има потврдени случаи на болеста.

Од превенција кон реакција

Разликата меѓу овие два вида акции е суштинска. Ларвицидното третирање е превенција – се удира по комарците додека се уште вода. Вонредната адултицидна акција по потврдени случаи е реакција – се удира по комарците што веќе летаат меѓу луѓе.

Западнонилската треска кај мнозинството заразени поминува без симптоми или како лесна грипозна состојба. Но кај постарите луѓе и кај оние со ослабен имунитет може да се развие тежок невроинвазивен облик. Затоа секој потврден случај менува категорија на итност.

Затворете ги прозорците вечерва. И прашајте се – што ако наредната година третирањето на местата каде што се мрестат комарците почне порано и биде поинтензивно, за да нема потреба од вонредни акции откако болеста веќе стигнала?