Багерите влегоа во Керамидница. Град Скопје почна со уривање на дел од куќите на трасата каде треба да се пробие булеварот што ќе се поврзе со мостот „Генерал Михајло Апостолски“ во Аеродром. Рокот за иселување на семејствата чии имоти беа опфатени со завршената експропријација истече на 3 септември – следниот ден почна кршењето.

Проектот е продолжение на булеварот АСНОМ и треба да ги поврзе Аеродром и Гази Баба. Според пресметките на Градот, од Лисиче до Судската палата со автомобил ќе се стигнува за 5 минути, со автобус за 10, со велосипед за 18, а пешки за 35 минути – заштеда до 20 минути за граѓаните на трите општини.

Мостот што стана виц

Оваа сообраќајница во планската документација на Скопје постои уште од 1965 година. Шеесет и една година. Проектот тргна во времето на Петре Шилегов, кога беше изграден мостот. Со доаѓањето на Данела Арсовска сè застана, а таа изјави дека мостот ќе биде за ловење риба, бидејќи имало нерасчистени имотно-правни односи на трасата низ Керамидница.

Тоа беше моментот кога еден инфраструктурен објект во главниот град официјално доби надимак. Мостот стоеше изграден и затворен, а градоначалничката се шегуваше со сопствениот град. Сега градоначалникот Орце Ѓорѓиевски вели дека по истекот на рокот за иселување создадени се услови да се продолжи со клучниот чекор.

Половина работа

Пробивањето ќе се одвива делумно. Кракот што треба да излегува зад трговскиот центар „Ист гејт“ е проблематичен поради нерешена експропријација и голем број судски постапки кои сè уште траат. Ѓорѓиевски тврди дека до крајот на мандатот ќе ги доврши преговорите. И самиот мост „Генерал Михајло Апостолски“, патем, сè уште не е отворен за сообраќај – иако тоа беше најавено.

Значи имаме мост што не се користи, булевар што се пробива до половина, и судски постапки што ќе одлучуваат за остатокот. Плус фамилии што минатата недела ги напуштија своите домови. Тие се исплатени, барем според Градот – „исплатени се сите предмети каде што е решена експропријацијата“.

Прашањето што останува не е дали булеварот ќе биде корисен. Ќе биде. Прашањето е зошто на еден град му требаат шест децении од идеја до багер, и колку мандати треба да поминат за да се пробие една улица од два и пол километри. Секој нов градоначалник ја наследува незавршената работа на претходниот и ја остава следната незавршена. Само куќите во Керамидница веќе ги нема.