Веспрем ја прегази Барселона со 42:33 за светската круна

Финалето на Супер Глоуб во Каиро беше финале само по име. Веспрем отвори со серија од 8:1 за 9:3, Барселона се приближи на 14:16, а потоа Унгарците повторно избегаа и го завршија мечот со 42:33. Победата со девет гола разлика е рекордна во финалињата на Светското клупско првенство, а Веспрем е првиот тим што дал 42 гола во едно финале. Најефикасен беше Уго Деска со десет гола, а играч на финалето стана голманот Емил Нилсен – кој летово дојде токму од Барселона и против поранешниот клуб имаше 12 одбрани. Во шампионскиот штаб има и македонски потпис: физиотерапевтот Димитар Маневски шест години работи во Веспрем, а претходно беше дел од Вардар што двапати ја освои Европа. Од двете европски титули со Вардар до светската со Веспрем – Маневски собира круни таму каде што се игра најголемиот ракомет.

Вардар го прегази Охрид во дербито

Дербито на Супер лигата во СЦ „Јане Сандански“ беше решено уште пред полувремето. Вардар во 17-тата минута водеше 8:3, на одмор отиде со 14:6, а во 46-тата минута разликата беше плус 13 (26:13). Конечно: 27:18. Избраниците на Иван Чупиќ имаат пет победи од пет кола и максимални десет бода, а ГРК Охрид го доживеа првиот пораз во сезоната. Кај црвено-црните по пет гола дадоа Љевар, Абделхак и Фадуил, а кај Охрид најпрецизен беше Јошида со четири. Мечот се бодуваше и за Регионалната лига, каде двата тима се во групата Б. Ако ова е главниот домашен ривал, Вардар засега во првенството игра сам против себе.

Пелистер падна дома, Червар се сети на расипаното јаболко

Еурофарм Пелистер ја отвори Европската лига на ЕХФ со пораз пред својата публика во Битола: 24:31 од Логроњо Ла Риоха, тим што на хартија важеше за аутсајдер. На полувремето беше 8:16. Голманот на гостите Хоан Ледо заврши со 20 одбрани, а кај Пелистер по четири гола дадоа Петар Атанасијевиќ и Самоил Ристевски. Тренерот Лино Червар не бараше алиби: „Можеби играчите од кои очекувавме повеќе не го дадоа потребниот придонес. Би искористил една изрека – едно расипано јаболко може да ја уништи целата гајба јаболка.“ И додаде дека му е жал за публиката што дојде да навива. Следува гостување кај Гдањск, кој во првото коло изненади во Гумерсбах со 38:34.

Ференцварош со гол во последните секунди, Мец и Ѓер без пораз

Четвртото коло во женската Лига на шампионите го донесе натпреварот на неделата во Унгарија. Ференцварош го совлада ЦСМ Букурешт со 24:23, откако Петра Шимон погоди во последните секунди, по израмнувањето на 23:23 само 31 секунда пред крајот. Голманката Ана Кристенсен имаше 18 одбрани. Во другиот унгарско-романски дуел Ѓер ја победи Бистрица со 36:32, иако Јохана Рајхерт даде 14 гола за гостинките. Шампионот Мец ја оствари најубедливата победа во колото, 36:25 против Никебинг. Хрватската Подравка конечно стигна до првите бодови, 33:31 против дебитантот Бломберг-Липе, со 11 гола на Матеа Шошо.

Европската лига стартуваше со балкански победи

Првото коло од новиот формат на ЕХФ Европската лига донесе 15 победи и едно нерешено, а меѓу победниците се и три клуба од соседството: хрватскиот Нексе, Извиѓач од Босна и Херцеговина и словенечкиот Слован. Словенците победија на гостување кај Татабања, која минатата сезона играше финале на Европскиот куп, а десното крило Тим Цокан даде 16 гола од 19 обиди. Во групата на Пелистер, пак, Гдањск ги изненади Германците од Гумерсбах. Групната фаза има само шест кола, па за Пелистер поразот во Битола веќе мора да се надомести во Полска.