Колку често да ја миеш косата: експертите велат дека прекумерното миење може да ја исуши кожата на главата, но и да ја натера да лачи повеќе маснотија

Есента е сезона кога косата паѓа повеќе, а полиците во аптеките се полнат со серуми против опаѓање. Пред да посегнеш по шишето, експертите предлагаат да погледнеш подолу – во кожата на главата.

Логиката е едноставна: кожата на главата го опкружува фоликулот на косата, па ако нешто не е во ред со неа, тоа се гледа и на косата. Но експертите се искрени и додаваат дека здравата кожа на главата не го спречува секој тип опаѓање, затоа што причините можат да бидат хормонални, генетски или поврзани со исхраната.

Колку често да се мие? Универзално правило нема. Два до четири пати неделно се смета за нормално, а секојдневно миење има смисла за тие што тренираат или имаат многу мрсна коса. Премалку миење носи перутање, чешање и иритација. Премногу миење ја нарушува заштитната бариера на кожата – резултатот е сувост, чувствителност или, парадоксално, уште повеќе маснотија.

Експертите разликуваат пет типа кожа на главата: нормална, мрсна, сува, чувствителна или реактивна, и кожа со перут или себороичен дерматитис. Последните два се најсклони кон воспаление и бараат најмногу внимание.

Новото во приказната е што состојките од негата на лицето се преселуваат на главата: ниацинамид, керамиди, хијалуронска киселина, пантенол, ексфолијантни киселини, пептиди, антиоксиданси, цинк, пребиотици и пробиотици, алое вера и бисаболол. Звучи како списокот на задната страна на крем за лице – затоа што токму тоа и е. Козметичката индустрија најде нов дел од телото на кој ќе ги продава молекулите што веќе ги продаде за лицето.

Исхраната останува основа: протеини, железо, цинк, витамините од групата Б, витамин Д и омега-3 масни киселини од мрсна риба, со урамнотежено јадење и доволно вода. Ништо од тоа не се купува во шише.

Советот на крајот е да се реагира рано, а не да се чека косата видливо да се проретчи. Колкумина почнуваат да се грижат дури кога ќе видат прамени на перницата?