„Стив Наумов“ реновиран за околу 10 милиони евра: месец подоцна вода низ ѕидовите, а МОН ги брои влажните марамици

Реконструираниот студентски дом „Стив Наумов“ во Скопје беше пуштен во употреба на крајот на септември, со најави за европски стандарди, нови инсталации и подобрена енергетска ефикасност. Не помина ни месец, а студентите пријавуваат вода што протекува низ ѕидовите, влага, ладни радијатори и оштетени ролетни – дефекти што, според нив, ги забележале уште при вселувањето.

За обновата на домот беа предвидени околу 10 милиони евра. Реконструкцијата на „Стив Наумов“ и „Кузман Јосифовски-Питу“ заедно е дел од инвестиција од околу 20 милиони евра. А сместувањето не е евтино: месечната партиципација во „Стив Наумов“ е 6.600 денари, речиси двојно повеќе од 3.410 денари колку што се плаќа во домовите од втора категорија. За девет месеци престој тоа е разлика од 28.710 денари по студент – разлика што беше оправдана токму со подобрените услови.

Министерството ги брои туѓите грешки

Одговорот на Министерството за образование и наука беше листа. Раководството на домот, наведуваат од МОН, се соочило со запушена канализација поради фрлени влажни марамици, алармен систем активиран од заборавена храна во вклучена микробранова печка и од запалена цигара во соба, откорнат радијатор и автомобили паркирани на зелените површини. Дел од проблемите, велат, можат да настанат сами по себе, но некои се предизвикани од корисниците. Објектот е под гарантен рок, изведувачот интервенира, а според министерството сите досега регистрирани проблеми се надминати.

Влажните марамици и цигарата се реални проблеми. Но вода низ ѕид не протекува поради микробранова печка. Ако објектот е во гарантен рок, кој ги прими работите и кој го вршеше надзорот врз изведбата? На тоа прашање засега нема одговор.

Опозицијата ги брои парите

Опозицијата веднаш го претвори домот во политичка мета. Социјалдемократската младина праша „за што се потрошија милионите“ и бара целосно објавување на сите трошоци и договори поврзани со проектот. Левица зборува за „фушерај“ и тврди дека до неа стигнуваат информации за пукнати цевки, кал од чешмите и периоди без струја – тврдења што министерството не ги потврди.

Засега нема независна стручна проценка колку се раширени дефектите, ниту потврда дека се присутни во целиот дом. Но студентите што плаќаат речиси двојно повеќе заслужуваат нешто посилно од апел за „одговорно користење на просториите“. Зимата не чека на гарантни рокови.