Нееднаквост на приходите: Македонија со Џини коефициент од 29,2, колку и просекот на ЕУ, а Бугарија на дното

Џини коефициентот, мерката за тоа колку нерамномерно се распределени приходите меѓу населението, за Македонија изнесува 29,2. Тоа е исто колку просекот на Европската Унија во 2025 година, покажуваат податоците што ги објави Европскиот завод за статистика – Евростат. Со една важна разлика: бројката за Македонија е од 2024 година.

Коефициентот се движи од 0 до 100 – нула значи целосна еднаквост, а сто значи дека едно лице го зема целиот приход. Во ЕУ просекот благо се подобрил, од 29,4 во 2024 на 29,2 во 2025 година. Најрамномерна е Словачка со 23, а по неа следуваат Белгија со 23,4, Чешка со 24, Словенија со 24,6 и Полска со 24,9.

На другиот крај е Бугарија, со 37,7 – највисока нееднаквост во Унијата – по која следуваат Латвија со 35,6 и Литванија со 35,5. Во регионот, Србија има 32, Црна Гора 31,6, Албанија 30,2 (податок од 2023 година), а Хрватска 28,5. Меѓу земјите надвор од ЕУ опфатени со статистиката, највисока вредност има Турција, со 43,9.

На прв поглед, Македонија изгледа подобро од повеќето соседи. Но рамномерна распределба не значи и висок стандард – може да се биде и рамномерно сиромашен. Џини коефициентот кажува како се дели колачот, не колку е голем.