Мечка нападна добиток во Калиште, а пред десетина дена шеташе покрај училиште во соседниот Добри Дол

Жителите на гостиварското село Калиште, во Општина Врапчиште, се соочија со мечка среде селото. Кафеава мечка упаднала и нападнала домашен добиток, а снимките и сведоштвата брзо се проширија по социјалните мрежи и предизвикаа страв кај луѓето.

Ова не е прва средба. Пред десетина дена жителите на соседното село Добри Дол, исто така во Општина Врапчиште, пријавија дека мечка по вторпат била забележана како слободно шета по улиците во непосредна близина на основното училиште „Сали Лиси“.

Законот е јасен: кафеавата мечка во Македонија е строго заштитена уште од 1996 година, а ловот е целосно забранет од 2009 година. Нејзината популација во Маврово и околните планини е во пораст. Експертите посочуваат дека однесувањето на мечките драстично се менува кога им се нарушени живеалиштата или кога ги има премногу, па во потрага по лесна храна – отпадоци, пчеларници, овоштарници, добиток – сè почесто влегуваат во населените места.

Центарот за управување со кризи и општините препорачуваат чистење на дивите депонии со храна околу селата и подобро обезбедување на трлата. Сточарите велат дека тоа не е доволно и бараат контролирана дислокација или намалување на бројот на мечките таму каде што претставуваат директна закана за луѓето.

Државата тука има две обврски што мора да ги помири – заштитата на видот и безбедноста на луѓето. Засега на сточарите им се препорачува да ги исчистат депониите. Колку уште нападнати стада треба за некој во институциите да донесе конкретен план, наместо препорака?