Битолскиот ФИКТ почна проект за климатска отпорност со универзитети од Шпанија и Италија

Универзитетот „Св. Климент Охридски“ – Битола, преку Факултетот за информатички и комуникациски технологии (ФИКТ), почна со реализација на проектот „Лабораторија за интелигенција за климатска отпорност“ (CRIL), заедно со Универзитетот во Кастиља-Ла Манча од Шпанија и Универзитетот во Ферара од Италија.

Според ФИКТ, учесниците ќе постават основа за координирано спроведување на активностите и за развој на заеднички пристапи кон климатската отпорност. Иницијативата е дел од пошироката мисија на Алијансата КОЛОРС, чија цел е зајакнување на соработката меѓу европските универзитети и нивните региони. Гостите, како што е вообичаено, ги видоа и културно-историските споменици на Битола.

Битола и Пелагонија добро знаат што значи климата да ја почувствуваш на свој грб – од сушните лета до загадениот зимски воздух. Затоа проект со ваков наслов е добредојден. Прашањето е дали од „лабораторијата“ ќе излезе нешто што граѓаните ќе го видат, или ќе остане уште една соработка опишана во соопштение и фотографија околу маса.