Ѓорѓиевски најави 6.000 нови дрвја во Скопје до крајот на сезоната, почна садењето на првите 3.500 садници

Скопје треба да добие 6.000 нови дрвја до крајот на сезоната, а садењето на првите 3.500 садници веќе почна. Најавата дојде од градоначалникот Орце Ѓорѓиевски, преку објава на Фејсбук.

Според него, акцијата ги опфаќа постојните и новите паркови, зелените површини долж булеварите и јавните простори во сите скопски општини. „Секое ново дрво е влог во градот во кој живееме и во иднината на нашите деца. Повеќе сенка за летните денови, почист воздух и повеќе зелени места за прошетки, игра и дружење“, напиша Ѓорѓиевски, додавајќи дека „зелено и чисто Скопје“ е обврска на која е силно посветен.

Во град што секоја зима се гуши во загаден воздух, секое дрво е добредојдено. Но објавата ги кажува бројката и пораката, а прескокнува сè друго: кои видови се садат, колку чинат садниците, точно каде одат и – најважно – кој ќе се грижи за нив следното лето. Садница што никој не ја полева е само фотографија за социјалните мрежи.

Затоа вистинската бројка нема да биде 6.000 засадени, туку колку од нив ќе бидат живи за две години. Ќе ја дознаеме ли и неа од Фејсбук?