Anthropic оди на берза со вредност до 1.404 милијарди долари, а за девет месеци изгуби 104 милијарди

Anthropic, компанијата што стои зад моделот Claude, ги објави условите за излегување на берза. Нуди 825 милиони акции по цена од 70 до 78 долари и очекува да собере меѓу 57,75 и 64,35 милијарди долари. Ако акциите тргнат по највисоката цена, целата компанија би вредела 1.404 милијарди долари – повеќе од 965-те милијарди при последното финансирање во мај, но далеку под 2.000 милијарди за кои пред неколку месеци се шпекулираше дека се целта.

Паралелно со берзата, компанијата приватно продава акции без право на глас во вредност од 26 милијарди долари, по истата цена како на берзата. Купувачи се AMD, Broadcom, Google, Micron, Microsoft, Nvidia и TSMC, а Google и Nvidia даваат по 10 милијарди. Со други зборови, компаниите од кои Anthropic купува чипови и облак сега стануваат и негови сопственици. Парите во оваа индустрија се вртат во круг. Вкупно, нето приливот би бил меѓу 84,6 и 93,7 милијарди долари.

Бројките во проспектот се уште поинтересни од цената. Годишниот приход по тековното темпо стигнал до 81 милијарда долари на крајот на октомври, десетина милијарди повеќе од месец порано. Само во третиот квартал приходот бил 17 милијарди. Но за првите девет месеци од годината компанијата прикажала нето загуба од 104 милијарди долари, а обврските за пресметувачка моќ и инфраструктура достигнале 900,9 милијарди. Во каса има речиси 132 милијарди. Брзо расте, уште побрзо троши.

Купувачите на берзата нема да добијат многу глас. Основачите имаат посебна класа акции со 50,1 отсто од гласовите, а посебен долгорочен фонд го бира мнозинството во одборот. Седуммина од основачите, меѓу кои извршниот директор Дарио Амодеи и претседателката Даниела Амодеи, продаваат по речиси 3,4 милиони акции – околу 250 милиони долари секој, по средната цена од 74 долари.

Тргувањето на Nasdaq се очекува околу 19 ноември, под ознаката „ANT“, а до 20 отсто од понудата е наменета за мали инвеститори. Една ситна измена во документот кажува многу за времето во кое живееме: компанијата на повеќе места го користи терминот „суперинтелигенција“ наместо „вештачка интелигенција“, повикувајќи се на септемвриската извршна наредба на Трамп со која државните служби мораат така да ја нарекуваат.

Ова е втората ВИ-компанија проценета на над илјада милијарди долари во само неколку дена: OpenAI минатата недела беше проценет на 1.250 милијарди, откако собра 11 милијарди – речиси половина од 20-те што ги бараше. Пазарот очигледно сè уште верува во приказната. Прашањето е колку долго ќе верува во компании што губат десетици милијарди годишно.