Државниот завод за ревизија (ДЗР) утврдил сериозни слабости во работењето на Фондот за иновации и технолошки развој (ФИТР) за 2024 година, покажува најновиот ревизорски извештај.

Според наодите, ФИТР немал воспоставен функционален систем за следење на резултатите од поддржаните проекти, ниту пак вршел соодветна длабинска анализа за ефектите од вложените јавни средства. На крајот на 2024 година, неподмирените обврски на Фондот достигнале 13,86 милиони евра, при што дел од обврските не биле правилно евидентирани во финансиските извештаи.

Ревизорите утврдиле и сериозни неправилности во процесот на доделување средства. Исти физички лица, преку повеќе различни фирми, добивале финансиска поддршка за повеќе проекти, што овозможувало паралелно користење на јавни средства без јасни ограничувања и контрола.

Дополнително, забележани се доцнења во исплатите кон корисниците, несоодветна евиденција на обврските и целосно отсуство на централизирана база на податоци за доделените средства и нивната реализација.

ДЗР препорачува итно воспоставување механизми за следење на ефектите од поддржаните проекти, како и подобрување на контролата и наплатата на средствата по нивното завршување, со цел поефикасно и транспарентно користење на јавните пари.

Според Законот за иновациската дејност, усвоен во јули 2025 година, Фондот за иновации и технолошки развој престанува да постои, а неговите надлежности ќе ги преземе новата Агенција за иновации, научно-технолошки развој и претприемништво.