ВАТИКАН – Папата Лав денес изјави дека ги следи настаните во Венецуела со „душа полна со загриженост“, откако САД го уапсија венецуелскиот претседател Николас Мадуро.
Во своето обраќање, Папата повика на зачувување на независноста на Венецуела и почитување на човековите права во таа земја, објави Ројтерс.

„Го следам развојот на ситуацијата во Венецуела со срце полно со загриженост. Доброто на саканиот венецуелски народ мора да преовлада над сите други размислувања и да доведе до надминување на насилството и движење по патот на правдата и мирот, гарантирајќи го суверенитетот на земјата, обезбедувајќи владеење на правото утврдено со Уставот, почитувајќи ги човековите и граѓанските права на секој човек и работејќи заедно за изградба на мирна иднина на соработка, стабилност и хармонија, со посебно внимание на најсиромашните кои страдаат поради тешката економска состојба“, рече Папата.

Соединетите Американски Држави вчера извршија воздушни напади врз Венецуела, а американскиот претседател Доналд Трамп објави дека американските специјални сили ги уапсиле Мадуро и неговата сопруга Силија Флорес и ги извеле од земјата.

Мадуро и Флорес моментално се наоѓаат во Притворниот центар во Њујорк.