Наплатата на патарини руши рекорди: Над 67,6 милиони евра инкасирани до 23 декември

Од наплатата на патарини, од почетокот на минатата година заклучно со 23 декември, остварен е вкупен промет од 4.158.914.362 денари, односно 67.624.624 евра, информира директорот на Јавно претпријатие за државни патишта, Коце Трајановски.

Според досегашните податоци, 2025 година ќе биде рекордна по наплата на патарини, имајќи предвид дека остварениот промет до 23 декември веќе е повисок од вкупната наплата во целата 2024 година и е зголемен за над 71 милион денари, иако декември сè уште не е завршен.

– До 23.12.2025 година е остварен промет од 4.158.914.362 денари (67.624.624 евра), што укажува дека годинава ќе биде најуспешна досега во однос на наплатата на патарини, изјави Трајановски за МИА.

Континуиран раст на приходите

Од ЈПДП посочуваат дека приходите од патарини бележат постојан раст во изминатите години. Анализата на вкупно остварениот промет, кој вклучува наплата на патарина, продажба и надополнување на електронски уреди, наплата на билети за ненаплатена патарина и средства собрани преку платформата „Отворен Балкан“, покажува јасен тренд на зголемување:

• 2020 година: 34.029.562 евра

• 2021 година: 46.401.122 евра

• 2022 година: 53.242.070 евра

• 2023 година: 62.077.966 евра

• 2024 година: 66.463.963 евра

Од ЈПДП информираат дека, по јавниот повик за воспоставување поширока мрежа за купување и надополнување на уредот М-ТАГ, склучен е договор со правните лица А1 Македонија и Македонски телеком за продажба, дистрибуција и наплата на патарина преку електронски уреди.

– Во моментот се врши интеграција на апликативните софтвери меѓу ЈПДП и овие компании, со цел услугите со М-ТАГ наскоро да бидат пуштени во употреба, информираат од претпријатието.

Со измените на Законот за јавни патишта, изгласани во јуни, се создаде правна основа за проширување на малопродажната мрежа за надополнување на М-карта и М-ТАГ, кои досега беа достапни исклучиво во просториите на ЈПДП.

Според надлежните, ваквиот модел ќе донесе:

• побрз проток на сообраќај на наплатните станици,

• поголема ефикасност и безбедност,

• намалување на злоупотребите,

• зголемено задоволство кај корисниците.