Франција го опиша намалувањето на царините на Кина за некои млечни производи од ЕУ, објавено денес, како „недоволно“, во услови на затегнати трговски односи со Пекинг, објави агенцијата Франс-прес.

По воведувањето „привремени“ царини за европските млечни производи во опсег од 21,9 до 42,7 проценти, кои стапија на сила во декември, Кина вчера објави дека на крајот ќе воведе значително пониски царини – помеѓу 7,4 и 11,7 проценти. Намалените стапки ќе важат од денес, 13 февруари, за период од пет години.

Тие опфаќаат широк спектар на производи, вклучувајќи свежи и преработени сирења, сини сирења, како и некои видови млеко и павлака.

„Ги земаме предвид заклучоците објавени вчера од кинеските власти“, изјавија во заедничка изјава францускиот министер за надворешни работи Жан-Ноел Баро и Никола Форизиер, министер делегат за надворешна трговија.

„Овие царини се оптоварувачки за нашите производители и за конкурентноста на нашиот извоз на стратешки пазар“, нагласија тие, забележувајќи дека мерките „влијаат на трговијата вредна речиси 430 милиони евра“.

Двајцата министри ги осудија „неоснованите“ обвинувања на кинеските власти, кои тврдат дека ги презеле мерките по антидампинг истрагата започната во август 2024 година.