Фехми Стафа, поранешен државен правобранител и адвокат, е веќе во затворот Шутка. Казна: една година и три месеци. Обвинение: примање поткуп од 50.000 евра за да влијае кај апелациски судија. Се спогоди со обвинителството, призна вина и отиде директно зад решетки.

Шемата е класична. Стафа примил 30.000 евра на 6 октомври 2025 година од сестрата на Лупчо Пецов – познат како „Ѓаволот” – лице во бегство обвинето за кривични дела против јавните финансии. На 13 декември побарал и примил уште 20.000 евра. Непосредно по примањето на вториот износ бил уапсен со парите кај себе.

100.000 евра за укинување притвор

Првично, Стафа побарал 100.000 евра за да посредува кај судија Ѓорѓе Ристов од Апелациониот суд за укинување на мерката притвор против Пецов. Добил половина. Обвинителството за гонење организиран криминал и корупција прецизира дека овие 50.000 евра се одделни од 350.000 евра пронајдени закопани во дворот на родителите на судијата Ристов.

Стафа ја извршувал функцијата државен правобранител од 2018 до 2022 година. По разрешувањето работел како адвокат и бил меѓу кандидатите за член на Судскиот совет. Значи: човек кој аплицирал да биде дел од телото што ги надгледува судиите – примал мито за да влијае врз судии.

350.000 евра закопани во двор, 50.000 евра во џеб на поранешен правобранител, судија под истрага – и сето ова за човек во бегство познат како „Ѓаволот.” Ако ова беше филм, никој немаше да поверува. Но ова е македонско правосудство, каде реалноста е секогаш пошокантна од фикцијата.