Такси-возачите во Скопје се на работ на протест. Од Авто-такси превозничката група предупредуваат на растечки револт поради проблеми што со години стојат нерешени – диви таксиметри, возачи без лиценци и закана за безбедноста на патниците.

Поплаката е стара, но затоа не помалку оправдана. Нелиценцираните такси-возила и оние со „диви” таксиметри ги штетат и легалните превозници и патниците – првите губат работа, вторите се качуваат во возила без никаква контрола ниту одговорност. „Институциите сè уште не реагираат за надминување на проблемите”, велат од групата.

И тука е најпознатата балканска болест – проблем за кој сите знаат, кој сите го гледаат секој ден на улица, а за кој никој не презема ништо додека некој не запретат со протест. Дивите таксиметри не се појавиле вчера; тие со години возат покрај легалните, на иста улица, под истиот неизвршен закон.

Заканата со протест е последно средство на луѓе што се чувствуваат изневерени од системот што требало да ги заштити. Прашањето за надлежните е едноставно: зошто е потребна закана за протест за да се спроведе закон што и онака постои? Кога регулацијата важи само за оние што сами доброволно ја почитуваат, тогаш всушност и не е регулација – туку казна за чесните.