Alphabet, mëma e Google, mblodhi rekord 85 miliardë dollarë përmes shitjes së aksioneve - oferta më e madhe e këtij lloji në histori. Dhe gjithë ato para shkojnë në një gjë: inteligjencën artificiale.

Shifra jo vetëm që është e stërmadhe, por e rrëzoi edhe rekordin e mëparshëm. Oferta më e lartë e kapitalit deri atëherë ishte 70 miliardë dollarë, e vendosur nga kompania braziliane e naftës Petroleo Brasileiro qysh në vitin 2010. Tani ai rekord është histori.

Interesante është edhe dinamika. Alphabet fillimisht planifikonte të shiste aksione për 40 miliardë, por interesimi ishte aq i madh sa oferta u mbiofrua - në fund mblodhi 45 miliardë. Berkshire Hathaway i Voren Bafetit bleu një pjesë me vlerë 10 miliardë dollarë. Edhe 40 miliardë planifikohen për tremujorin e ardhshëm, gjë që e jep shumën e përgjithshme prej 85.

„Kjo është pjesë e strategjisë sonë shumëvjeçare të investimeve për ta kapur mundësinë që mbart IA-ja dhe për ta mbështetur kërkesën që shohim nga kompanitë dhe konsumatorët", deklaroi drejtori ekzekutiv Sundar Piçai. Në përkthim: Google planifikon të shpenzojë 180 deri në 190 miliardë dollarë në shpenzime kapitale deri në fund të vitit, kryesisht për infrastrukturë dhe qendra të dhënash për IA.

Të jemi të qartë - Alphabet nuk është kompani në vështirësi. Vetëm në tremujorin e parë raportoi të ardhura prej 110 miliardë dollarësh, rritje prej 22 për qind në nivel vjetor. Sidoqoftë, kur një kompani e shëndoshë merr hua kaq, pyetja nuk është nëse mund ta përballojë, por pse mendon se duhet.

Përgjigjja qëndron në një shifër tjetër. Sipas Goldman Sachs, për pesë vitet e ardhshme tashmë janë premtuar thuajse 8 trilionë dollarë për inteligjencën artificiale në tërë industrinë. Kjo është një shumë që i kalon ekonomitë e kontinenteve të tëra. Oferta e Alphabet është edhe sinjal për një varg kompanish të IA-së që presin radhën për bursë - Anthropic, SpaceX, OpenAI. Por gjithë kjo varet nga një supozim: se investitorët do të vazhdojnë të derdhin para në premtime, vit pas viti. Dhe premtimet, siç e di mirë Ballkani, nuk bëhen gjithmonë fabrika.