ASOM kërkon tërheqjen e Ligjit për lojërat e fatit: 10.000 vende pune në kumar

Pas debatit publik në Kuvend, nga Asociacioni i operatorëve për organizimin e lojërave të fatit (ASOM) kërkojnë që projektligji për lojërat e fatit të tërhiqet dhe të hartohet plotësisht nga e para. Sipas tyre, ai hap çështje serioze kushtetuese dhe ekonomike që nuk mund të zgjidhen me amendamente të vogla.

Kryetari i ASOM-it, Vasko Ilijevski, pohon se pas retorikës mbrojtëse fshihet një përpjekje për monopol shtetëror në bastet online. „Si mund shteti të jetë njëkohësisht edhe gjyqtar edhe garues në të njëjtën lojë?", pyet ai. Eksperti Zoran Puhaç e vlerësoi modelin e propozuar tatimor si „ekonomikisht të paqëndrueshëm", duke paralajmëruar se do ta shkatërronte drejtpërdrejt tregun legal - duke tatuar madje edhe fitim joekzistues kur të ardhurat reale janë nën 1.000 euro, pra duke tatuar humbjen.

Argumenti më i rëndë është ai njerëzor. Nga shoqata „Dua të punoj" paralajmërojnë se ligji mund të kushtojë rreth 10.000 vende pune dhe të nxisë një valë të re largimi. Ndërsa nga Këshilli Kombëtar i organizatave të invalidëve kujtojnë se mijëra persona me aftësi të kufizuara, që marrin mbështetje përmes programeve të financuara nga industria, do të mbeteshin pa qasje në qendrat ditore, mjete ortopedike dhe programe sportive.

Lojërat e fatit shpallen lehtë si e keqe shoqërore - dhe për një pjesë të tyre kjo është e vërtetë. Por kur një ligj miratohet me nxitim, pa debat të vërtetë me ata që paguajnë tatim dhe punësojnë mijëra, atëherë pyetja nuk është më për kumarin. Pyetja është a do shteti ta rregullojë tregun - apo do vetë ta marrë. E ato janë dy gjëra shumë të ndryshme, të fshehura pas së njëjtës retorikë mbrojtëse.