Pa pasaportë, në listën e ndalimit, e megjithatë në Sofje: kush e la Iva Mihailovën të kalojë kufirin?

E akuzuar për aksident trafiku me pasojë vdekjeje, pa të dyja pasaportat, me ndalim për ta lëshuar Koçanin dhe me emrin në listën e ndalimit të MPB-së. E gjithë kjo nuk mjaftoi. Iva Mihailova, 23 vjeçe, e cila ka shtetësi maqedonase dhe bullgare, tani është në Sofje, ndërsa institucionet maqedonase deri tani përgjigjen me atë që e dinë më së miri - kumtesa.

Çfarë thotë sistemi, e çfarë thotë ajo

MPB kontrolloi në sistemin e kontrollit kufitar dhe konstatoi se për të nuk ka dalje të evidentuar nga vendi. Kontroll bëri edhe policia kufitare bullgare përmes Qendrës së Përbashkët të Kontaktit - as atje nuk ka hyrje legale të evidentuar në Bullgari. Sipas dy shteteve, pra, Mihailova zyrtarisht nuk e ka kaluar kurrë kufirin.

Ajo pohon të kundërtën. Para mediave bullgare deklaroi se shëndeti i ishte përkeqësuar, se e kaloi kufirin bashkë me avokatin e saj, se e tregoi letërnjoftimin maqedonas dhe se u kthyen në Bullgari „pa asnjë problem“. Avokati i saj bullgar, Nikolaj Dimitrov, thotë se në vendkalimin maqedonas u tregua letërnjoftimi maqedonas, ndërsa në atë bullgar dokumentet bullgare. Në cilin vendkalim - nuk do ta thotë, për të mos u krijuar probleme njerëzve që, sipas tij, i ndihmuan. Vetë pranon se kjo mund të jetë shkelje e masave që i ka caktuar gjykata maqedonase.

Burime të pozicionuara lart në MPB e tregojnë historinë ndryshe. Sipas tyre, Dimitrov e la territorin maqedonas me një veturë në të cilën pranë tij ulej edhe një mashkull tjetër, ndërsa Mihailova nuk ishte në ndenjëse. Pohimet e tij se kishte ndihmë nga policë dhe kufitarë maqedonas këto burime i quajnë gënjeshtër dhe propagandë. Mirë. Por nëse nuk ishte ulur në veturë, ku ishte - dhe kush duhej ta vërente këtë?

Masat që ekzistonin vetëm në letër

Prokuroria nxiton të shpjegojë se pjesën e vet e ka kryer. Që nga 9 tetori 2025, me propozim të prokurorit publik, iu morën të dy dokumentet e udhëtimit, maqedonasi dhe bullgari. Iu shqiptua ndalim për të kaluar kufirin me letërnjoftim, ndalim për ta lëshuar Koçanin dhe detyrim për t'u paraqitur te një person zyrtar. Rreziku nga arratisja, thonë ata, ishte një nga arsyet kryesore pse disa herë dhanë mendim negativ për kërkesën që t'i kthehej pasaporta.

Rreziku nga arratisja, pra, ishte i njohur, i shkruar dhe i përsëritur me muaj. Arratisja megjithatë ndodhi. Kush kontrollonte nëse e respektonte ndalimin për ta lëshuar Koçanin? Kush ndiqte nëse paraqitej te personi zyrtar? Një masë që askush nuk e zbaton nuk është masë, por formular.

Koha e ngjarjes shton edhe një nuancë të pakëndshme. Arratisja ndodhi pikërisht ndërsa përmes rrugës diplomatike po merreshin vesh që mjekë bullgarë të vinin në Maqedoni dhe ta vlerësonin gjendjen e saj shëndetësore. Mbrojtësi i saj në Koçan, avokati Naser Raufi, thotë se edhe vetë është i befasuar - po përgatiste kërkesë të re në Gjykatë për mjekim në Bullgari. Tani, thotë ai, gjykimi do të duhet të vazhdojë në mungesë të saj.

Kjo nuk është arratisja e parë në familje. Babai i saj, Simeon Mihailov, në mënyrë të ngjashme e la vendin dhe i shpëtoi dënimit me burg pas aktgjykimit për vepra të rënda penale, ndër to edhe tentim vrasje.

Sofja e priti, Shkupi kërkon fajtorin

Në Bullgari largimi i Mihailovës u prit me entuziazëm nga mediat dhe politikanët. Presidentja Iliana Jotova deklaroi se nuk dinte për ardhjen e saj, por se është e gatshme të takohet personalisht me të sapo t'ia lejojë shëndeti. Ministri i Punëve të Brendshme, Ivan Demerxhiev, premtoi se do të merret në pyetje për të përcaktuar nëse, kur, ku dhe si e kaloi kufirin - dhe se do të marrë mbrojtje nëse i nevojitet. Ministrja e Punëve të Jashtme, Velisllava Petrova-Çamova, pohon se ministria e saj nuk ka marrë pjesë, por nuk humbi rastin ta vlerësojë si „rast humanitar“ që në Maqedoni nuk mori reagim të duhur, prandaj u ndërmorën „veprime të dëshpëruara“.

Ministri bullgar, pra, dëshiron të përcaktojë si arriti në Bullgari një person nga lista maqedonase e ndalimit. MPB maqedonase kërkon pikërisht këtë përgjigje. Nëse të dyja policitë vërtet e kërkojnë, ajo nuk duhet të jetë e paarritshme - avokati që e mori është i njohur me emër e mbiemër dhe jep intervista në televizion.

Në shtëpi, opozita kërkon dorëheqje. LSDM kërkoi që ministri i Punëve të Brendshme, Pançe Toshkovski, të largohet, me arsyetimin se nëpër vendkalimet kufitare tani kalojnë lirshëm edhe të arratisurit nga drejtësia. Aleanca Demokratike kërkon që institucionet të përcaktojnë si e la Mihailova shtetin aq lehtë dhe thekson se arratisja ndodhi pikërisht kur ishte pranuar vlerësimi nga mjekët bullgarë - vlerësim që mund t'i përgjigjej pyetjes nëse gjendja e saj ishte vërtet kërcënuese për jetën.

Pyetjes për shëndetin e saj tani do t'i përgjigjen mjekët në spitalin „Pirogov“ të Sofjes. Pyetjes për kufirin nuk mund t'i përgjigjet askush tjetër përveç institucioneve maqedonase. Nëse nuk mund të thonë si u zhduk një e akuzuar me pasaporta të marra, atëherë lista e ndalimit është vetëm një listë emrash që shteti i lut me mirësjellje të mos largohen.