Gjashtë pezullime për rrahjen në Saraj, ndërsa raporti policor ende mbetet nën çelës

Gjashtë policë do të pezullohen dhe ndaj tyre do të nisë procedurë për shkelje të rendit dhe disiplinës së punës. Kaq bëri MPB katër ditë pas ndërhyrjes në Saraj në të cilën dy të rinj, 21 dhe 23 vjeç, përfunduan të rrahur. Dhe kjo pasi pamjet tashmë qarkullonin në publik.

Kontrolli i Brendshëm, sipas kumtesës së 11 tetorit, pas shqyrtimit të pamjeve dhe deklaratave të dëshmitarëve konstatoi „një varg parregullsish“ në veprimin e policëve. Prokuroritë paralelisht lëshojnë urdhra për ekspertizë, ndërsa pas dokumentimit të provave MPB paralajmëron parashtresa përkatëse. Në letër, sistemi reagon. Pyetja është nëse do të reagonte edhe pa videon.

Pamjet që i ndryshuan gjërat

Për ngjarjen e 7 tetorit publiku nuk mësoi nga policia. BDI fillimisht publikoi fotografi të djemve të lënduar, e më pas edhe video: e xhiruar nga larg, pa zë, në të cilën para një veture të parkuar disa persona me shqelma dhe grushta sulmojnë persona të tjerë, ndërsa nëpër mjegull shihen dritat rrotulluese të policisë. Dy të rinjtë pohojnë se janë goditur edhe pasi ishin mposhtur dhe ishin vënë në pranga.

Nëse bëhej fjalë për një aksion serioz policor, pse publiku mësoi për të nga një kumtesë partiake dhe nga djemtë e lënduar, e jo nga një buletin policor?

Versioni i sindikatës

Sindikata e Pavarur e Policisë doli me një histori krejt tjetër. Sipas tyre, bëhej fjalë për aksion kundër tregtisë së paligjshme me drogë në autostradën Shkup - Tetovë. Të dyshuarit fillimisht u përpoqën t'i shtypnin policët, më pas i morën armën zyrtare njërit prej tyre, dhe duke ikur shkaktuan disa aksidente trafiku në të cilat u lënduan. Gjatë kontrollit shtesë, thonë ata, u gjet edhe drogë. Sindikata dënon ashpër përpjekjet që rasti të marrë parashenjë etnike dhe kërkon verifikim të kujdesshëm të gjithë ngjarjes.

Asnjë nga këto pohime - për armën, për drogën, për prejardhjen e lëndimeve - nuk shfaqet në kumtesën e MPB-së. Dhe edhe sikur të gjitha të jenë të sakta, mbeten dy gjëra të ndryshme: ajo që i dyshuari ka bërë para arrestimit dhe ajo që policia guxon t'i bëjë pasi është mposhtur. Për të parën vendos gjykata. Të dytën e ndalon ligji.

Politika arriti para hetimit

BDI tani kërkon që MPB ta publikojë raportin fillestar të patrullës, procesverbalet dhe dokumentacionin shoqërues, me mbrojtje të të dhënave personale dhe të integritetit të hetimit. Pyetjet e tyre janë të thjeshta: kush e ka përpiluar raportin, çfarë kanë deklaruar policët që morën pjesë në ndërhyrje dhe nëse versioni i tyre përputhet me pamjet.

Nga VLEN kundërpërgjigjen se institucionet reaguan në kohë rekord dhe se askush nuk mund t'i ikë përgjegjësisë. Zëvendësministri i Punëve të Brendshme, Astrit Iseni, porositi se „uniforma shërben për ta mbrojtur qytetarin, jo për ta rrahur“ dhe se „asnjë dyshim nuk e arsyeton dhunën ndaj qytetarit“. Menjëherë pas kësaj e akuzoi opozitën se dhunën e shndërron në llogari politike.

Mirë që zëvendësministri e shqiptoi atë fjali. Më mirë do të ishte që MPB ta mbështeste me dokumente. Raporti që e kërkon BDI nuk është tekë partiake - është minimumi që çdo polici ia detyrohet publikut kur pamjet tregojnë ndërhyrje me shqelma dhe grushta. Nëse versioni i policëve përputhet me pamjet, publikimi do t'i mbrojë. Nëse nuk përputhet, pezullimi është vetëm fillimi.