„Nëse çdo 12 kilometra i quajmë autostradë të re, Maqedonia ka gati 29 autostrada!“

Më 12 tetor 2026, ministri i Transportit Aleksandar Nikolloski paralajmëroi fillimin e ndërtimit të autostradës Bukojçan - Kërçovë, duke e prezantuar si autostradën e gjashtë që po ndërtohet në Maqedoni.

Bëhet fjalë për një segment të gjatë rreth 12 kilometra, pjesë e Korridorit 8, që duhet të mundësojë lidhje të pandërprerë autostradale nga Shkupi deri në Ohër.

Projekti Bukojçan - Kërçovë nuk nis nga zero në vitin 2026. Që në vitin 2020 ekzistonte dokumentacion projektues për këtë segment, ndërsa në vitet në vijim u siguruan mjete financiare dhe u përgatit realizimi. Në vitin 2025 Nikolloski paralajmëronte se ndërtimi duhet të përfundojë deri në fund të vitit 2028. Sot, në tetor 2026, në fillimin zyrtar të punimeve përmendet afat prej katër vitesh, që do të thotë përfundim në vitin 2030.

Sipas të dhënave të Entit Shtetëror të Statistikave, Maqedonia në fund të vitit 2025 kishte 347 kilometra autostrada.

Nëse ato 347 kilometra i ndajmë në segmente nga 12 kilometra, do të fitojmë gati 29 autostrada! Natyrisht, Maqedonia nuk ka 29 drejtime të veçanta autostradale. Por pikërisht ky krahasim tregon sa e rëndësishme është të dallohet autostrada nga segmenti autostradal. Bukojçan - Kërçovë nuk është ide e re për drejtim të ri. Është pjesë e lidhjes autostradale Shkup - Ohër, e cila planifikohet me dekada. Ndërtimi i segmentit Kërçovë - Ohër nisi që në vitin 2014. Që atëherë kanë kaluar më shumë se 12 vjet, janë ndërruar disa qeveri, ministra, afate dhe llogaritje financiare, ndërsa lidhja e plotë autostradale ende nuk ka përfunduar. Tani paralajmërohet edhe një segment i të njëjtit korridor, me afat përfundimi prej katër vitesh, përkatësisht deri në vitin 2030. Askush nuk e kontestion nevojën për ndërtimin e këtij segmenti. Përkundrazi, përfundimi i tij është i domosdoshëm për lidhjen funksionale të pjesës perëndimore të Maqedonisë. Por publiku ka të drejtë ta dijë dallimin mes një projekti të ri, një kantieri të ri dhe një drejtimi të ri autostradal. Maqedonisë nuk i nevojitet garë në numrin e autostradave të paralajmëruara, por kilometra të përfunduar, afate të respektuara dhe shpenzim transparent i parave publike. Sepse autostrada nuk matet sipas numrit të inaugurimeve solemne dhe gurëve të themelit, por sipas asaj se sa kilometra janë ndërtuar dhe sa qytetarët mund t'i përdorin në mënyrë të sigurt. Nëse çdo 12 kilometra i quajmë autostradë të veçantë, atëherë Maqedonia tashmë ka gati 29. Por nëse flasim për drejtime autostradale plotësisht të përfunduara, atëherë duhet t'i numërojmë ndryshe.