Dmitri Medvedev nuk la hapësirë për interpretim - fabrikat e dronëve nëpër Evropë janë objektiva legjitime ushtarake për Rusinë. Lista e impianteve në Britani, Gjermani dhe vendet e tjera që prodhojnë dronë për Ukrainën, sipas tij, është "një listë e objektivave të mundshëm për forcat e armatosura ruse".

Koha e goditjes? "Varet nga zhvillimet e ardhshme", tha Medvedev, që përkthehet: kur Moska vendos se mjafton. Establishmenti ushtarak rus e sheh prodhimin e shtuar evropian të dronëve si përshkallëzim të drejtpërdrejtë - Evropa, thonë ata, po shndërrohet në "zonë strategjike të pasme" të Ukrainës.

Britania është në krye të listës. Fabrikat e saj prodhojnë pjesën më të madhe të dronëve që përfundojnë në frontin ukrainas. Gjermania ndjek. Mediat ruse tashmë detajojnë objektiva potenciale, dhe analisti Boris Rozhin shkoi një hap më tej - duke quajtur shtetet evropiane "sponsorë të drejtpërdrejtë të terrorizmit shtetëror".

A është kjo kërcënim real apo edhe një raund tjetër retorike ruse të dizajnuar për të mbjellur frikë? Një gjë është e sigurt: kur Medvedev publikisht emëron fabrika si objektiva ushtarake, kjo nuk është deklaratë e rastësishme. Në Ballkan e dimë mirë çfarë do të thotë kur dikush fillon të emërojë objektiva.

Pyetja nuk është nëse Rusia mund të godasë tokën evropiane. Pyetja është sa larg është e gatshme të shkojë Evropa në mbështetjen e Ukrainës - dhe nëse vërtet e ka llogaritur rrezikun.