Ekonomia maqedonase në tremujorin e dytë të këtij viti ka shënuar rritje reale prej 4,3 për qind krahasuar me të njëjtën periudhë të vitit të kaluar, ndërsa ndërtimtaria është rritur për 21,9 për qind. Shifrat i paraqiti kryeministri dhe kryetari i VMRO-DPMNE-së, Hristijan Mickoski - jo në konferencë për shtyp, por mbrëmë në një tubim në Bërvenicë, në fushatën për zgjedhjet e parakohshme lokale.

Interesante është se Mickoski, në të njëjtin fjalim, vetë e tërhoqi vijën mes shifrës dhe portofolit. „Rritja duhet të vazhdojë dhe rezultatet të ndihen më shumë - në rroga më të larta në periudhën që vjen, në më shumë vende pune të paguara mirë, shkolla, rrugë, ujësjellës, kanalizime, institucione shëndetësore dhe shërbime publike që funksionojnë“, tha ai. Me fjalë të tjera: rritja ekziston në statistikë, ndërsa rrogat ende duhet ta arrijnë.

Kryeministri iu përgjigj edhe kritikave për „ekonominë e tretë në Evropë“. „Tani kur jemi të parët në rajon ma nxjerrin deklaratën ‚Mickoski nuk e tha të vërtetën, nuk jemi ekonomia e tretë në Evropë‘, sipas rritjes paskemi qenë të katërtit. Mirë, e pranoj“, tha Mickoski, duke shtuar se në kohën e pushtetit të mëparshëm vendi ishte i fundit në rajon. Ai porositi se që nga ardhja e kësaj qeverie rreth gjysmë miliardi euro janë drejtuar drejtpërdrejt në projekte në komuna, nga të cilat disa milionë kanë përfunduar edhe në Bërvenicë, dhe paralajmëroi thirrje të re për financimin e projekteve vitin e ardhshëm.

Dizeli dhe meritat. Në pjesën ekonomike të fjalimit, Mickoski u mburr edhe me karburantet. „Kudo në botë rritet, në Maqedoni, te ne lirohet. Kjo është politika e kësaj qeverie“, tha ai, duke e lidhur lirimin e dizelit me TVSH-në e ulur. Vendimi i Komisionit Rregullator të Energjetikës, megjithatë, tregon edhe diçka tjetër: në javën e kaluar çmimi referent i dizelit në tregun botëror ra për 6,73 për qind. TVSH-ja e ulur prej 10 për qind nuk është e re - ajo vlente edhe javën e kaluar, kur dizeli u shtrenjtua për 5,50 denarë.

Rritja prej 4,3 për qind është shifër reale dhe nuk është e vogël. Por dallimi mes BPV-së dhe jetës së qytetarëve nuk matet në tubime, por në fund të muajit. Vetë kryeministri e tha këtë - tani mbetet të shihet kur „periudha që vjen“ do të bëhet e tashme.