Bojkovski nga fshati Dragomancë i Kumanovës, i akuzuar për vrasjet e grave në Nagoriçan të Vjetër, dje para Gjykatës Themelore në Kumanovë pranoi se kreu tre nga katër vrasjet që i vihen në barrë. Sipas aktakuzës, ai vrau katër gra dhe tentoi të vrasë edhe dy të tjera, ndërsa vrasjet që i pranoi ndodhën në periudhën nga janari 2025 deri në shkurt 2026, në disa fshatra të komunës.

Megjithatë, pranimi nuk ishte i thjeshtë. Bojkovski përgjigjej kryesisht me „po“ dhe „jo“, ndërsa në pyetjet e prokurorit Lubomir Lape jepte përgjigje konfuze se cilat gra i kishte vrarë e cilën jo. Në fillim pohoi se nuk e kishte vrarë gruan nga fshati Kleçovcë, e më vonë tha të njëjtën gjë edhe për një tjetër nga viktimat. I ndryshoi edhe motivet - tani thotë se e bënte për para. Deklaroi gjithashtu se pendohet për gjithçka që ka bërë.

Prokurori Lape mendon se i akuzuari me këtë mbrojtje po përpiqet ta lehtësojë pozitën e tij. „Ai i ka pranuar veprat penale te prokurori publik dhe për të gjitha veprat penale ka edhe prova të tjera materiale që e mbështesin aktakuzën. Mënyra e mbrojtjes është e drejtë e tij“, deklaroi Lape.

Eksperti: llogaritës, jo i sëmurë. Psikiatri forenzik prof. dr. Stojan Bajraktarov vlerësoi se te Bojkovski nuk është konstatuar sëmundje mendore dhe se nuk ka bazë për trajtim psikiatrik, por se duhet të dërgohet në institucion ndëshkues. Aftësitë e tij intelektuale, sipas konstatimit, janë në kufirin mes aftësisë së kufizuar intelektuale të lehtë dhe kapaciteteve normale, ndërsa përgjigjet e shkurtra vijnë nga fjalori i kufizuar, jo nga moskuptimi i gjuhës. Prandaj gjykata e refuzoi kërkesën e mbrojtjes për logoped ose përkthyes.

Si shembull, eksperti përmendi se i akuzuari dinte të përshkruante me hollësi si iku nga një shtëpi kur u shfaq një veturë e bardhë, sepse supozoi se ishte djali i gruas. Sipas ekspertizës, kjo tregon se ai dinte ta dallonte rrezikun, të reagonte dhe të ikte - dhe se gjatë kryerjes së veprave ishte llogaritës.

Meqë, sipas aktakuzës, me dashje ka privuar nga jeta disa persona, Bojkovskit i kanoset dënim me burg prej së paku dhjetë vjetësh ose burgim i përjetshëm. Fjalët përfundimtare janë caktuar për 6 tetor. Familjet e grave të vrara presin aktgjykimin, ndërsa prokuroria porosit se provat nuk varen nga ajo që i akuzuari do të thotë në sallën e gjyqit.