Dje në mëngjes Shkupi u zgjua me kontrolle në disa lokacione. Ministria e Punëve të Brendshme dhe Agjencia për Siguri Kombëtare, nën udhëheqjen e një prokurori nga Prokuroria Publike Themelore për Ndjekjen e Krimit të Organizuar dhe Korrupsionit (PPTH KOK), shoqëruan disa persona për dyshime për vepra penale në fushën e terrorizmit.

Fjalia zyrtare është e shkurtër dhe e njohur: „Pas përfundimit të aksionit, publiku do të informohet“. Nga MPB shtuan se aksioni po zbatohet nga Sektori për Luftë kundër Terrorizmit pranë Njësisë për Luftimin e Krimit të Organizuar dhe të Rëndë, në koordinim me ASK. Sa njerëz janë shoqëruar, kush janë dhe për çfarë saktësisht akuzohen - deri tani asnjë fjalë.

Ajo që dihet vjen nga burime të komunitetit të sigurisë dhe inteligjencës të përfshira në aksion. Sipas tyre, bëhet fjalë për një grup prej rreth pesë personash që dyshohet se merrej me fajde, por edhe me indoktrinim dhe nxitje të terrorizmit. Gjatë kontrolleve, sipas të njëjtave burime, u gjetën një flamur i ISIS-it, armë dhe municion.

Fajde dhe radikalizim në të njëjtin grup? Kombinimi tingëllon i çuditshëm, por pikërisht ai është pjesa më interesante e historisë. Nëse paratë me kamatë dhe indoktrinimi kalonin nëpër të njëjtat duar, pyetja është nëse njëra e ushqente tjetrën - dhe që kur shërbimet e ndjekin këtë grup.

Ende nuk dihet as nëse të shoqëruarit janë shtetas maqedonas apo të huaj, as nëse aktivitetet e mundshme ishin të drejtuara kundër Maqedonisë apo shteteve të tjera. Nuk dihet as nëse bëhet fjalë për ekstremistë tashmë të regjistruar apo për persona të rinj. Të kthyerit e dënuar nga ISIS-i në Maqedoni pothuajse të gjithë i kanë vuajtur tashmë dënimet me burg dhe janë në program risocializimi. Nëse ai program funksionon, do ta tregojë pikërisht ajo që PPTH KOK do të njoftojë kur të përfundojë aksioni.

Në aksione të tilla fshehtësia është e kuptueshme sa zgjat operacioni. Por pas përfundimit, MPB dhe prokuroria u detyrohen qytetarëve shifra të qarta: sa persona, çfarë armësh, çfarë provash. Siguria nuk ndërtohet vetëm me arrestime, por edhe me besimin se institucionet do të thonë saktësisht çfarë kanë gjetur.