Sofja: garanci nuk ka, vetëm „gatishmëri politike“ - Mucunski kthehet me pranimin se qëndrimet janë „shumë larg“

Maqedonia kërkon garanci se pas ndryshimeve kushtetuese nuk do të vijë bllokadë e re. Sofja përgjigjet se garanci nuk ka dhe se garancia më e mirë është - të përmbushet ajo që është shkruar në kornizën negociuese. Ky është, në një fjali, rezultati i takimit të ministrit të Punëve të Jashtme Timço Mucunski me homologen bullgare Velislava Petrova-Çamova në Sofje.

Takimi u mbajt në margjinat e konferencës ministrore për Korridorin 8. Mucunski e përshkroi si konstruktiv dhe në „frymë pozitive“, por thelbin nuk e zbukuroi. „Duhet të jem absolutisht transparent dhe i qartë, nuk është se zgjidhëm ndonjë çështje thelbësore, qëndrimet janë ende shumë larg“, tha ai.

Mosbesim me histori

Ministri maqedonas shpjegoi edhe pse Shkupi kërkon garanci. „Ne jemi vend që ndër vite vazhdimisht ka pasur kërkesa dypalëshe dhe sapo mbyllej një kërkesë dypalëshe, pastaj hapej një e re. Pra, ai mosbesim ekziston“, tha Mucunski. Sipas tij, çështjet e lidhura me gjuhën, identitetin, historinë dhe kulturën nuk guxojnë ta rëndojnë rrugën evropiane.

Petrova-Çamova nuk u tërhoq asnjë milimetër nga korniza e vitit 2022. Bullgaria, thotë ajo, e mbështet perspektivën evropiane të Maqedonisë, por pret përmbushjen e detyrimeve të marra, ndër to edhe ndryshimet kushtetuese. „Asnjë shtet anëtar nuk mund t'i japë garanci asnjë shteti tjetër kandidat për vazhdimin e procesit. Por ajo që mund të japë është gatishmëria politike për t'iu përmbajtur detyrimeve të marra“, tha ajo. Dhe shtoi se përmbushja e detyrimeve është „rruga më e drejtpërdrejtë dhe e garantuar“.

Garanci pa garanci

Le ta zbërthejmë ofertën: garanci nuk ka, por rrugë e garantuar ka - nëse bëni atë që kërkohet. Maqedonia këtë e dëgjon që nga viti 2022, ndërsa Mucunski tani thotë publikisht se problemi nuk është te një pikë e marrëveshjes, por te besimi se pas asaj pike nuk do të vijë tjetra.

Të dy ministrat ranë dakord që dialogu të vazhdojë. Dialogu është gjithmonë më i mirë se heshtja. Por kur njëra palë thotë „nuk ka garanci“, ndërsa tjetra „nuk ka besim“, për çfarë saktësisht do të bisedohet në takimin e radhës?