Shefi i diplomacisë maqedonase Timço Mucunski dhe ministrja bullgare e Punëve të Jashtme Velislava Petrova-Çamova mund të takohen të enjten, më 8 tetor, në Sofje. Këtë nuk e njoftoi Shkupi, por Ministria bullgare e Punëve të Jashtme, e cila i deklaroi agjencisë BTA se në margjinat e konferencës ministrore për Korridorin 8 „do të ketë mundësi të mbahet një takim bilateral, i cili është pjesë e dialogut të rregullt mes dy vendeve“.

Nga Ministria maqedonase e Punëve të Jashtme dhe Tregtisë së Jashtme deri tani nuk ka konfirmim zyrtar se Sofja e ka pranuar kërkesën. Kryeministri Hristijan Mickoski, gjatë vizitës në Tearcë, tha se përgjigje ende nuk ka dhe se Qeveria do të komentojë kur ajo të mbërrijë. Pra, për takimin e ministrit maqedonas mësojmë së pari nga pala bullgare.

Iniciativa erdhi pas vizitës së javës së kaluar të presidentes së Komisionit Evropian, Ursula von der Lajen. Mickoski tha se e dëgjoi këshillën e saj dhe i kërkoi Mucunskit të dërgojë notë diplomatike me kërkesë për takim. Ai e hodhi poshtë tezën se pas bisedës kishte mbetur i pakënaqur - përkundrazi, thotë ai, von der Lajen e vlerësoi punën e Qeverisë si „frymëzuese“.

Nga pala bullgare mesazhet janë të njohura. Presidentja Iliana Jotova tha se Bullgaria është gjithmonë e hapur për bisedime, por pa ultimatume dhe pa lëshime nga politika evropiane, dhe se çështja nuk duhet trajtuar si mosmarrëveshje bilaterale, por si pjesë e politikës evropiane të zgjerimit. Lideri i GERB-it Bojko Borisov, nga ana e tij, pret zbatimin e marrëveshjes për fqinjësi të mirë.

Opozita nuk pret asgjë. Lideri i LSDM-së Venko Filipçe mendon se kontakte të tilla duhej të kishte edhe deri tani, ndërsa hapat e pushtetit i vlerëson si alibi. „Qëndrojmë në vend, shanset kalojnë pranë nesh, ndërsa të rinjtë po shpërngulen“, thotë ai.

Takimi i fundit i dy ministrave ishte në maj, në margjinat e takimit ministror të NATO-s në Helsingborg, dhe të dyja palët atëherë mbetën në pozicionet e tyre. Tani Shkupi kërkon takim me këshillë nga Brukseli, ndërsa Sofja përgjigjet përmes agjencisë së vet të lajmeve. A do të sjellë e enjtja bisedë të vërtetë, apo vetëm edhe një fotografi në kolltuk para logos së ndonjë konference?