Më 3 tetor, Muzeu i Kulturës Bizantine në Selanik i dorëzoi kryeministrit bullgar Rumen Radev eshtrat që identifikohen me car Samuilin. Në Sofje kortezhi u prit në sheshin „Battenberg“, me himn dhe përshëndetje nderi me 21 topa. Në këmbim, Bullgaria i dorëzon Greqisë 48 objekte, kryesisht vegla kishtare nga disa manastire në Maqedoninë e Egjeut, të cilat sipas palës bullgare ishin „shpëtuar“ nga shkencëtarë bullgarë gjatë Luftës së Parë Botërore.

Gazetarët e pyetën kryeministrin Hristijan Mickoski nëse ky veprim do të ketë implikime në marrëdhëniet e Maqedonisë me Greqinë dhe Bullgarinë. Ai u përgjigj me histori: çështja duhet parë „përmes prizmit të Marrëveshjes së Bledit“, të arritur pas kapitullimit të „Bullgarisë fashiste, e cila, do të thoja, e kishte pushtuar gjatë Luftës së Dytë Botërore territorin e Maqedonisë së sotme“.

„Sa i përket bartjes së eshtrave, unë do të kthehesha disa dekada prapa, kur eshtrat e gjigantit maqedonas Dellçev, si rezultat i asaj Marrëveshjeje të Bledit, u sollën në Shkup“, tha Mickoski.

Problemi me kalendarin

Eshtrat e Goce Dellçevit u sollën në Shkup në tetor 1946. Marrëveshja e Bledit mes Josip Broz Titos dhe Georgi Dimitrovit u nënshkrua në vitin 1947. Pra, eshtrat arritën një vit para marrëveshjes që, sipas kryeministrit, i solli. Gabimin e vunë re menjëherë mediat bullgare - dhe më e pakëndshmja është kur për Dellçevin të korrigjojnë nga Sofja.

Ka edhe një shtresë të dytë. Në vend që të thoshte çfarë mendon Shkupi për aktin mes Athinës dhe Sofjes, kryeministri iu kthye „administrimit“ - fjalës që ish-kryeministri Zoran Zaev e përdori në një intervistë për një agjenci bullgare në nëntor 2020 - dhe opozitës, e cila sipas tij ka „kukullat e veta“ dhe „i drejton“. Pyetja ishte për Greqinë dhe Bullgarinë. Përgjigjja përfundoi te LSDM.

Mickoski shprehu keqardhje që „pak kush e përmend sot Marrëveshjen e Bledit“. Ndoshta është kështu. Por nëse thirresh te historia në një ditë kur fqinjët e shkruajnë para kamerave, datat janë më e pakta që duhet të jetë e saktë. A ka Shkupi qëndrim për vetë transferimin - apo vetëm për Bledin?