Takimi Mucunski - Petrova në Sofje: Bullgaria e konfirmoi, por formatin e mbajti për vete

Ministrat e Punëve të Jashtme Timço Mucunski dhe Velislava Petrova-Çamova sot duhet të takohen në Sofje, në margjinat e konferencës ndërkombëtare ministrore për Korridorin 8. Konfirmimi nga pala bullgare erdhi pas disa ditësh pritjeje, me një notë diplomatike në të cilën, siç njoftoi kryeministri Hristijan Mickoski, thuhet se formati dhe mënyra „do të përcaktohen më vonë“.

Me fjalë të tjera, Shkupi e di se do të ketë takim, por nuk e di çfarë takimi. „Do të shohim në çfarë formati dhe si do të duket ai takim, nëse do të jetë pull aside, nëse do të jetë takim bilateral në margjinat e Samitit për Korridorin 8“, tha Mickoski. „Pull aside“, në fjalorin diplomatik, është një bisedë e shkurtër anash sallës kryesore. Për marrëdhëniet që e mbajnë rrugën evropiane të Maqedonisë në ngecje prej vitesh, kjo është hapësirë modeste.

Mesazhi i Qeverisë është i njohur: vetëm me dialog, marrëdhënie të mira fqinjësore dhe qëllimin evropian, „diçka që e kemi merituar prej shumë kohësh“, siç tha kryeministri. Nga LSDM-ja, nga ana tjetër, nuk presin asgjë. Fani Karanfilova-Panovska pyet pse fare shkohet në Sofje për të biseduar për kornizën negociuese, pasi presidentja e Komisionit Evropian të premten, sipas LSDM-së, e konfirmoi identitetin dhe gjuhën maqedonase. „A nuk është kjo një përpjekje që në vend të evropianizimit të bëjnë bilateralizim të procesit“, tha ajo.

Veto vetëm në fund?

Takimi vjen në një moment kur në Bruksel po hapet një temë më e madhe. Komisioni Evropian propozon që shtetet anëtare të vendosin me shumicë të kualifikuar për hapjen dhe mbylljen e kapitujve negociues për kandidatët, me çka e drejta e vetos do të zhvendosej në fund të procesit. Komisionerja Marta Kos propozon edhe një periudhë kalimtare prej 15 vjetësh për anëtarët e rinj, gjatë së cilës ata mund të mbeten pa të drejtë vote ose pa një pjesë të fondeve evropiane nëse i shkelin standardet demokratike.

Mickoski këtë e lexon si konfirmim të tezës së tij: „Kjo është shumë e ngjashme me atë që themi ne kur bëhet fjalë për ndryshimin e Kushtetutës - që ai ndryshim praktikisht të bëhet i zbatueshëm atëherë kur ne t'i përfundojmë negociatat“. Ai pohon gjithashtu se për integrimin gradual shteti i plotëson dy nga tre kushtet - harmonizimin me politikën e përbashkët të sigurisë dhe mbrojtjes dhe reformën e prokurimit publik, që duhet të miratohet javën e ardhshme - ndërsa për të tretin, reformat specifike për çdo vend, pritet Brukseli.

Kritikave të opozitës iu përgjigj pa doreza: „Do të vijë dita kur do të turpërohen për atë që sot ua bëjnë edhe qytetarëve, edhe Maqedonisë“.

Ballkani e njeh mirë këtë skenë - ministra në margjinat e një konference infrastrukturore, e nga biseda e tyre pritet të shkëputet një proces që qëndron në vend prej vitesh. Nëse Sofja nuk është e gatshme as për tryezë, por vetëm për një bisedë anash, sa realiste është që zhbllokimi të vijë pikërisht prej andej?