Drejtori i Byrosë për Siguri Publike, Aleksandar Janev, erdhi në Prilep me një fjali të gatshme për titull: „Miti për të paprekshmit në Prilep më në fund ra.“ Shifrat që solli janë më serioze se slogani: 37 lokacione të kontrolluara, kallëzim penal për 21 persona, 14 të dyshuar në paraburgim deri në 30 ditë dhe edhe katër persona në arrest shtëpiak.

Lokacioni i fundit, i 37-ti, nuk ishte as banesë as magazinë, por kasafortë bankare në Prilep. Në të policia gjeti më shumë se 50.000 euro, ndërsa janë konfiskuar edhe automjete. Aksioni filloi më 30 shtator, pas hetimit shumëmujor, në Prilep, Shkup dhe Strugë. Sipas MPB-së, është shkatërruar një grup 21-anëtarësh - 20 persona nga Prilepi dhe një nga Shkupi - i dyshuar për tregti të palejuar me drogë dhe krim ekonomik.

Katër kontrolle te policë

Detajin më të pakëndshëm Janev e tha vetë: nga 37 kontrollet, katër ishin te nëpunës policorë të punësuar në Sektorin për Punë të Brendshme Prilep. Ata nuk janë përfshirë në kallëzimin penal kundër 21 personave, sepse për ta vepron Kontrolli i Brendshëm i MPB-së. Me fjalë të tjera, një pjesë e dyshimeve çojnë pikërisht te njerëzit që duhej ta ndiqnin rrjetin.

Sipas Janevit, të dyshuarit për më shumë se 15 vjet e ndërtonin rrjetin për shitjen dhe shpërndarjen e drogës. Pesëmbëdhjetë vjet është stazh i gjatë për „paprekshmëri“. Kush shikonte e nuk shihte? Kjo pyetje për momentin nuk është në asnjë kumtesë.

Drejtori paralajmëroi prani të shtuar policore në Prilep dhe i ftoi qytetarët të mos jenë „vëzhgues të heshtur“. Policia do të kërkojë bashkëpunim edhe nga pronarët e objekteve hotelierike, për të cilët Janev mendon se „me siguri një pjesë e madhe“ kanë pasur përvoja me të dyshuarit. Ky është pranim interesant. Nëse hotelierët e dinin, si nuk e dinin me vite institucionet?

Në të njëjtën deklaratë, Janev pohon se gjendja e sigurisë në Prilep është „e favorshme“ dhe se krimi i rëndë është në rënie. Këto dy fjali qëndrojnë të qeta njëra pranë tjetrës vetëm në një fjalim policor: një rrjet që, sipas vetë policisë, për më shumë se 15 vjet shet drogë dhe një qytet që statistikisht është i qetë.

Hetimi vazhdon dhe, sipas Janevit, nuk përjashtohet të ketë të dyshuar të rinj. Masat e gjykatës janë për sigurimin e pranisë, jo aktgjykime - të gjithë të përfshirët për momentin janë të dyshuar. Testi i vërtetë për „rënien e mitit“ nuk do të jetë numri i kontrolleve, por nëse rasti do të arrijë në sallën e gjyqit, përfshirë edhe katër të uniformuarit.