Në Koçan është hapur qendër ditore për persona me aftësi të kufizuara. Në hapje ishin ministri i Politikës Sociale, Demografisë dhe Rinisë Gjoko Velkovski, kryetari i komunës Vlladko Grozdanov dhe sekretari i përgjithshëm i Kryqit të Kuq, Sait Saiti.

Qendra, sipas ministrit, do të ofrojë mbështetje, aktivitete për zhvillim personal, socializim dhe pavarësi më të madhe, të përshtatura sipas nevojave të çdo përdoruesi. Është e dedikuar për persona mbi 26 vjeç me aftësi të kufizuara të rënda trupore, intelektuale ose të kombinuara. Kapaciteti: 12 përdorues në muaj.

Për familjet që çdo ditë mbajnë një barrë të tillë, çdo vend i ri do të thotë shumë. Por 12 vende është shifër që kërkon përgjigje, jo vetëm fotografi me ministër, kryetar komune dhe kamera. Sa njerëz me aftësi të kufizuara të rënda jetojnë në rajonin e Koçanit dhe sa prej tyre do të mbeten para derës? Këtë shifër në hapje nuk e dëgjuam.

Velkovski thotë se ministria vazhdon t'i zgjerojë shërbimet sociale që të jenë „të qasshme dhe afër qytetarëve“. Mirë. Atëherë paralajmërimi i ardhshëm le të vijë me plan - sa vende, në cilat qytete dhe deri kur.