Spitali i ri në Kërçovë filloi të ndërtohet në vitet tetëdhjetë të shekullit të kaluar. Ministri i parë i shëndetësisë erdhi ta shohë në vitin 1998, 13 vjet pas fillimit të ndërtimit. Që atëherë nëpër Kërçovë kaluan 21 ministra me premtime. I fundit është Sasho Klekovski.

Ndryshe nga paraardhësit, Klekovski të paktën nuk premtoi datë. „Për herë të parë punojmë me financim konkret, nuk jemi në fazën e premtimeve, por në fazën e studimit të fizibilitetit dhe projektimit“, tha ministri. Sipas tij, ekziston një paketë prej 195 milionësh për përfundimin e Klinikës në Shtip, për rikonstruimin dhe objektin e ri të Klinikës në Tetovë dhe për objekt të ri të Spitalit të Përgjithshëm në Kërçovë. „Mjetet i kemi“, thotë ai.

Por fjalia që tregon më së shumti është tjetër: po bëhen studime nëse mund të vazhdohet me objektin ekzistues apo do të kërkohet lokacion i ri. Pas gati katër dekadash, shteti ende nuk e di nëse betoni që e paguante vlen diçka. Ndërtimi ngeci në nivelin e karabinës, ndërsa konstruksioni i vjetër, sipas raporteve, është i vjetëruar dhe nuk i plotëson standardet bashkëkohore për institucione mjekësore. Një pjesë e madhe e milionave të shpenzuara, pra, rezultuan para të hedhura.

Aparate ka, mjekë nuk ka mjaftueshëm

Ndërsa priten studimet, ministri thotë se „nuk presin“ - spitalin po e forcojnë që tani. Drejtoresha Maja Cvetanoska Trajkovska numëron rentgen të ri digjital, mamograf digjital dhe aparat 3D eko, donacion nga Komuna. Nga ministria thonë se janë punësuar në mënyrë të përhershme 4 specializantë dhe 4 mjekë të mjekësisë së përgjithshme, ndërsa procedura për edhe 5 specializantë është në fazën përfundimtare.

„Pajisjet pa kuadër nuk do të thonë asgjë, ndërsa kuadri pa pajisje nuk mund të punojë“, thotë Klekovski. E saktë. Spitali punon në kushte të këqija dhe me mungesë kuadri në disa reparte, ndërsa mjekët dhe infermieret që kanë mbetur në objektin e vjetëruar punojnë përtej kufijve të tyre. Nëse nesër ndërtohet ndërtesë e re - kush do të punojë në të? Pa kushte që do ta mbajnë një mjek të ri në Kërçovë, aparatet e reja do të jenë vetëm inventar më i shtrenjtë.

Kryetari i komunës Aleksandar Jovanovski thotë se kërçovarët meritojnë spital të ri dhe se Komuna do të vazhdojë të ndihmojë. Kërçovarët kanë dëgjuar mjaft premtime për një jetë të tërë. Ministri i ardhshëm që do të vijë në Kërçovë le të sjellë leje ndërtimi, jo deklaratë.