Shefi i Prokurorisë së Lartë Manastir mbeti pa pasaportë: Dyshohet se ka ndërhyrë për dënime më të buta në të paktën katër lëndë

Njeriu që udhëheq Prokurorinë e Lartë Publike Manastir, institucioni që e mbikëqyr punën e prokurorive themelore në Manastir, Prilep, Ohër, Strugë dhe Resnjë, dje mbeti pa pasaportë dhe me ndalim për të kryer aktivitete të caktuara pune. Masat e kujdesit ia caktoi gjyqtari i procedurës paraprake në Gjykatën Themelore Penale Shkup, me propozim të Prokurorisë për ndjekjen e krimit të organizuar dhe korrupsionit (PSP KOK).

Institucionet zyrtarisht e fshehin pas inicialeve: „P.V. (61) nga Prilepi“, i dyshuar për veprën penale „pranim shpërblimi për ndikim të kundërligjshëm“. Në publik ka dalë tashmë edhe emri - bëhet fjalë për Peco Veziroskin, i cili është në krye të Prokurorisë së Lartë Manastir që nga 30 shtatori 2022.

Ndërhyrje për dënime më të ulëta në të paktën katër lëndë

Sipas PSP KOK, me masa të posaçme hetimore janë siguruar prova për dyshim të bazuar se ai e ka shfrytëzuar pozitën zyrtare dhe ndikimin real për të ndikuar mbi vendimet e kolegëve prokurorë dhe gjyqtarëve në të paktën katër lëndë në territorin që e mbulon. Ka ndërhyrë, pohon Prokuroria, për dënime më të ulëta ose për pozitë më të favorshme të të dyshuarve dhe të akuzuarve në procedura penale.

Një ditë më parë u kryen kontrolle në shtëpinë e tij dhe në hapësirat e Prokurorisë së Lartë. U sekuestruan telefona, kompjuter dhe memorie USB. Për një vepër penale që në vetë emërtimin e ka fjalën „shpërblim“, në kumtesat zyrtare për tani nuk ka asnjë fjalë për para.

Hija e një pasaporte tjetër

Emri i prokurorit edhe më herët është përmendur në publik - për shkak të pasaportës së biznesmenit manastiras Borçe Markovski, i akuzuari i parë për një tender prej mbi 1,7 milionë euro për dislokimin e stacioneve nga miniera „Osllomej“ në REK „Manastir“. Prokuroria Themelore në Strugë kishte dhënë mendim negativ për kthimin e pasaportës së tij, por nga Prokuroria e Lartë Manastir kërkuan të jepej pozitiv. Gjykata e Strugës ia ktheu pasaportën, ndërsa Markovski e braktisi shtetin përmes „Tabanovcës“, për t'u kthyer më vonë.

A është pikërisht ai rast mes katër lëndëve? Këtu informacionet ndryshojnë. Një pjesë e mediave e lidhin hetimin me Markovskin, ndërsa një burim nga hetimi pohon se ajo lëndë për tani nuk është mes të katërave dhe se po kontrollohen edhe raste të tjera.

Kryeministri Hristijan Mickoski më 31 korrik në Manastir foli për „manipulim të vrazhdë nga një prokuror publik lokal“ dhe premtoi se personalisht do ta ndjekë procesin. Levica, nga ana tjetër, që më herët kishte dorëzuar parashtresë në Këshillin e Prokurorëve Publikë kundër Veziroskit, për mosveprim në lëndën për ndërtimin pa leje në Strugë.

Prokurori kompetent nuk propozoi paraburgim, prandaj gjykata, siç thekson vetë, nuk mund të shqiptonte masë më të rreptë se ajo e propozuar. Prokurorët po e ndjekin prokurorin që gjoja i ka presionuar prokurorët. E qytetarët nga pesë qytete kanë të drejtë për një pyetje të thjeshtë: kush do t'i kontrollojë tani aktgjykimet e marra nën një „ndërhyrje“ të tillë?