Serbia njoftoi se po blen një prej sistemeve më të fuqishme të mbrojtjes ajrore në Evropë - HQ-9 kineze. Presidenti Aleksandar Vuçiq e njoftoi blerjen gjatë një paraqitjeje të pajisjeve ushtarake në aeroportin Batajnica: „Tani po blejmë HQ-9, dhe ndoshta edhe diçka tjetër."

Sipas portalit ushtarako-analitik Military Watch, me këtë sistem Serbia mund të zotërojë një mbrojtje ajrore me rreze veprimi deri në 300 kilometra - më shumë se „Patriot"-i amerikan (200 km) dhe SAMP/T NG francez (150 km), me lëvizshmëri më të madhe se ekuivalentët perëndimorë. Në letër, kjo do të thotë mundësi për krijimin e zonave të gjera të ndalimit të fluturimit mbi rajon.

Këtu ia vlen të ruhet maturia. „Amerikanët në këmbë" dhe „arma që ndryshon gjithçka" janë tituj, jo fakte - nuk ka reagim zyrtar nga Uashingtoni, vetëm një analizë e një portali të specializuar. Sidoqoftë, thelbi është real: një vend ballkanik që nuk është anëtar i NATO-s po blen armatim kinez të klasit të lartë, pikërisht në mes të një rajoni të rrethuar nga anëtarë të aleancës.

Për fqinjët kjo nuk është thjesht një pyetje teknike. Kur një shtet ballkanik e armatos qiellin me teknologji kineze, ndërsa një tjetër rri nën çadrën e NATO-s, ekuilibri i fuqisë në rajon zhvendoset në heshtje. Pyetja nuk është nëse Serbia ka të drejtë të armatoset - çdo shtet e ka - por se ku të çon gara në të cilën çdo fqinj dëshiron të jetë më i fortë se tjetri.