Sofja e priti Mucunskin, e të nesërmen iu përgjigj nga foltorja: „Rinegocim nuk mund të ketë“

Takimi në Sofje u dakordua me propozimin e presidentes së Komisionit Evropian Ursula von der Leyen, e cila javën e kaluar vizitoi Maqedoninë. Ministri i Punëve të Jashtme Timço Mucunski u ul me kolegen bullgare Velislava Petrova-Çamova më 8 tetor. Përgjigjja e saj e vërtetë erdhi të nesërmen - jo në tryezë me Mucunskin, por nga foltorja e Kuvendit Popullor bullgar, në pyetje të një deputeti të partisë „Rilindja“.

„Bullgaria nuk merr pjesë në konsultime për rinegocimin e obligimeve të marra me Shkupin. Nuk ka nevojë për asnjë negociatë për marrëveshje të re, sepse negociata të tilla janë të papranueshme për vendin tonë, ashtu si edhe çfarëdo ndërmjetësimi për këtë temë. Rinegocim nuk mund të ketë“, porositi Petrova-Çamova.

Sofja i mbylli të gjitha dyert

Sofja e refuzoi rinegocimin. E refuzoi ndryshimin kushtetues me veprim të shtyrë - formulën që duhej t'i jepte Maqedonisë siguri se pas futjes së bullgarëve në Kushtetutë nuk do të pasojë një rreth i ri kërkesash. Dhe kundërshtoi kategorikisht shumicën e cilësuar në procesin e zgjerimit, iniciativë që kryeministri Hristijan Mickoski e përshëndeti si shenjë se në BE shihet dëmi nga keqpërdorimi i vetos.

Ministrja bullgare shkon edhe një hap më tej: pretendimet për rinegocim i quajti të pabaza dhe tha se ato mund të shpjegohen me „qëllime të politikës së brendshme në Shkup“. Si rrugë të vetme përmendi marrëveshjen e vitit 2022, ndërsa futjen e bullgarëve në Kushtetutë si hapin e parë të domosdoshëm.

Thelbi është parashikueshmëria

Mucunski pas takimit e përshkroi atmosferën si pozitive, por qëndrimet si të largëta, ndërsa besimin si të ulët. Asnjë nga çështjet e mëdha nuk është zgjidhur. Thelbi i mosmarrëveshjes është parashikueshmëria: Shkupi kërkon garanci se përmbushja e një kushti nuk do të hapë kërkesa të reja për historinë, identitetin apo gjuhën. Petrova-Çamova përgjigjet se një shtet anëtar nuk mund të garantojë paraprakisht si do të rrjedhë i gjithë procesi i anëtarësimit.

Me fjalë të tjera, nga Maqedonia kërkohet të bëjë hapin e parë, pa asnjë garanci për të ardhshmin. Në Sofje Mucunski u takua edhe me eurokomisionaren Marta Kos, e cila përcolli interesimin serioz të Komisionit për zhbllokim, ndërsa të nesërmen para ambasadorëve holandezë foli për një proces „të bazuar në merita“.

Brukseli i solli të dyja palët në bisedë. Sofja e shfrytëzoi kuvendin e vet për të thënë se bisedë për thelbin nuk do të ketë. Nëse ndërmjetësi evropian nuk mund të sigurojë as bisedë për garanci, kush atëherë do ta garantojë parashikueshmërinë për të cilën flet Shkupi?