Të mitur vandalizuan këndin e lojërave për fëmijë „Patrik“ në komunën shkupjane Aerodrom, duke shkaktuar dëme prej disa mijëra eurosh. Skena u xhirua dhe u shpërnda në rrjetet sociale, ndërsa komuna e mbylli këndin për arsye sigurie.

Kryetari i komunës Dejan Miteski doli në terren dhe porositi se „një sjellje e tillë nuk guxon të mbetet pa ndëshkim, sepse bëhet fjalë për shkatërrim të qëllimshëm të pronës publike“. Rasti u paraqit në polici, ndërsa komuna premtoi se do ta riparojë dëmin dhe do ta zëvendësojë pajisjen sa më shpejt. Ai falënderoi edhe qytetarin Nikolla Popoviq, i cili parandaloi shkatërrim të mëtejshëm.

Është e lehtë që e gjithë historia të reduktohet në „rininë e sotme“. Por një kënd lojërash i shkatërruar për disa mijëra euro nuk është vetëm problem i disa fëmijëve që mërziten një pasdite - është edhe pyetje se ku janë prindërit, çfarë bëjnë shkollat dhe pse lagje të tëra nuk u ofrojnë të rinjve asgjë tjetër përveç mërzisë.