Një vend që prej dekadash dridhet nga kriza ekonomike, këtë herë u drodh fjalë për fjalë. Kubën e goditi tërmeti më i fortë në gati 150 vjet - një lëkundje me fuqi 6,1 ballë, në thellësi prej 26 kilometrash, me epiqendër në bregun veriperëndimor të ishullit, rreth katër orë me makinë nga Havana.

Përmasat janë historike. Sipas sizmologut Pol Erl nga instituti gjeologjik amerikan, asnjë tërmet me fuqi të tillë nuk e ka goditur zonën në një rreze prej 322 kilometrash që nga viti 1880. Atëherë një lëkundje e ngjashme goditi zonën San Kristobal - hera e fundit më shumë se një shekull më parë.

Për momentin autoritetet nuk raportojnë dëme të mëdha as viktima, por shqetësimi është real për një arsye tjetër: vitet e mjerimit ekonomik i kanë lënë ndërtesat në gjendje të keqe, ndërsa ndërprerjet e rrymës e vështirësuan komunikimin. Kur infrastruktura është tashmë në gjunjë edhe pa tërmet, çdo lëkundje sjell më shumë rrezik nga ç'tregon numri i ballëve.

Lëkundja u ndie madje edhe në Florida dhe në gadishullin meksikan Jukatan - në Kankun, Plaja del Karmen dhe Tulum - ku autoritetet aktivizuan protokollet e emergjencës. Cunami nuk u shpall. „Ishte e fortë. Kurrë s'kam ndier diçka të tillë", tregoi një banore 44-vjeçare nga Pinar del Rio. „Njerëzit dolën me vrap jashtë, të gjithë ishin të frikësuar - sikur këtu kurrë të mos kishte pasur tërmet."