Franca kërkoi që nga lista e sanksioneve evropiane të hiqet miliarderi rus-uzbek Alisher Usmanov, njeri që vetë Unioni e konsideron të afërt me Vladimir Putinin. Kroacia dhe Italia e mbështetën kërkesën, sipas shkrimit të Financial Times. Shumica e vendeve anëtare janë kundër.

Deri këtu e gjithë kjo do të ishte një grindje e zakonshme për një oligark. E çuditshmja vjen më pas.

Kërkesa e Parisit nuk ka lidhje me Rusinë, as me luftën në Ukrainë. Sipas burimeve, Franca po përpiqet të arrijë marrëveshje me Azerbajxhanin për lirimin e disa shtetasve francezë të mbajtur atje - dhe heqja e Usmanovit nga lista është pjesë e asaj tregtie. Pra, sanksionet e vendosura për shkak të agresionit rus tani ofrohen si monedhë për zgjidhjen e një mosmarrëveshjeje krejt tjetër.

Diplomatët evropianë nuk e fshehën habinë. Parisi deri tani kurrë nuk e kishte presionuar Unionin t'i zbuste masat ndaj oligarkëve rusë. Një diplomat e përshkroi gjendjen me një fjalë: befasuese.

Kur kalon njëri, radha është e gjatë

Sllovakia edhe më herët kërkoi të hiqen edhe Usmanovi edhe Mihail Fridmani. Sapo u bë e qartë se Usmanovi mund të kalojë, Luksemburgu dha sinjal se ndoshta do të kërkojë të njëjtën edhe për Fridmanin. Mosmarrëveshja që nisi si një emër kërcënonte të bëhej listë.

Presidenti ukrainas Volodimir Zelenski i bëri thirrje partnerëve evropianë të mos lëshojnë pe. Formulimi i tij ishte i drejtpërdrejtë: oligarkët rusë, pa të cilët sistemi i Putinit është i paimagjinueshëm, duhet të ndiejnë se askund në botë nuk janë të sigurt sa kohë zgjat kjo luftë.

Pyetja që mbetet është më e madhe se çdo emër i veçantë. Nëse masat e vendosura për shkak të një lufte mund të shkëmbehen për diçka që nuk ka lidhje me atë luftë, atëherë ato masa nuk janë parim - janë pozicion në negociata. Kurse pozicioni, ndryshe nga parimi, ka çmim.

Në Ballkan këtë e dimë përmendsh. Me vite na shpjegohej se kushtet evropiane janë të pandryshueshme, se bëhet fjalë për vlera e jo për tregti. Pastaj shohim si një kryeqytet kërkon përjashtim për një miliarder dhe merr dy mbështetës. Kush do të na thotë herën tjetër se lista e kushteve është e paprekshme?